سس سیزلیک دن کوچه نین قولاغی باتمیش دیر. هردن گیج بیر قارقانین بوغونوق سسی کوچه نی اویاتماق ایسته ییردی. هئچ بیر گئت – گل یوخیدی . من یاری یاتمیش ، یاری اویاق بیر دوروم دایدیم . گؤزلریم کئییمیش کیمی ایدی . کوچه نین سس سیزلییی منی لاپ یوخویا باسدیرماق ایسته ییردی .  .  .

بیردن بیره قولاغیمی بیر اینیلتی  ده برتدی . « کؤمــــک ،کؤمـــک ،کؤمـــک »! بو سس هردن کسیلیر آنجاق آز سونرا یئنه ده ییردی قولاغیما « کؤمک ... »! من اویانارکن داها دایانا بیلمه دیم . تله سیکله یئریم دن قوپوب حه یه طه سیچیرادیم . تئز قاپینی  آچدیم کی او کؤمک ایسته یه نی خیلاص ائله ییم . قاپینی آچان کیمی گؤزوم کؤهنه داشقالی ، اوستو- باشی کیرلی بیر یئنی یئتمه اوغلان اوشاغینا دوشدو!« چؤره ک ، چؤره ک، چؤره ک» ! بونو ائشیده ن کیمی من بیر آز اؤزومه گلدیم . اوچؤره ک سسله ییرمیش ، من ایسه اونو کؤمک ائشیدیردیم ! او زامان باشیمی آشاغی سالیب ایچه ری دؤندوم ...

ایندی او گوندن نئچه ایل کئچیر و من هله ده بو فیکیرده یم کی او اوغلان ، او مکتب صند لینده یوخ ، داشقایا اوتورموش اوغلان ، بلکه ائله کؤمک ایسته ییرمیش !