. . .  ياتاغيما يانار اود دوشسون بير گئجه دوشونجه نيز  باشيما قيوريلماسا ! تارلا دوشگونو قيزلار ! سيزين سئودادان قيتلي گونلرينيز و اؤيله جه مكتب دن اوزاق بارماقلارينيز مني ، سينديرماسا حاياتيم سؤنسون ! بو آلوو بويالي مؤوسوم ده سيز ، سرين دالغالارا بورونه بيله ردينيز و ساچلارينيز كوله يه ساورولا بيله ردي آنجاق ! آنجاق هانسي قارقا خبرينيزي اوزاق دنيزلره آپاراجاق ، ماهني سيز و رقص سيز خاطيره لرينيزين خبريني ! اليمدن نه گه لير ! اوندا كي عارسيزليق! گؤزومو يوخويا باتيرار و سوكوت كؤكسومده هر دؤيونتونو دايانديرار . تارلا یاشاملی قيزلار ! مني سيزين گنج آرزولارينيزين باغلي پنجره لردن آسيلاجاق صاباح كي حاياتي  سيخير ! نه يازيق كي باشيمدان دا بير ايش گلمز ! ايندي  سيزه شعر يازماق نئجه ده ايرنج دير ! آخي هانسي كلمه لر سيزين آياقلارينيزين آغير – آغير باداقلاريني داشييا بيله ر ! و هانسي سؤز او ،  گيزلي حيرصينيزي چيلغين قاسيرغالارا آچا بيله ر ! سئويشسه يدينيز غرورلا و اؤيله جه  بؤيوسه يدينيز  بلكه هيچ بو سطيرلرده اولامازدي ! سيزه بوش – بوش دانيشماق نئجه ده ايرنديريجي دير ! قوي من لال اولوم ! ائله بو خوش كي سيرتينيزي سؤنوك گونشه  چئويريرسينيز و ال لرينيزده كي  ساپلي دميردن باشقا كيمسه يه اينانمير سيز ! من نئجه سيزه اسير دييه بيله رم تارلا قيزلاري .