اوزاق لاردا دؤيونن باياض تورپاق لار اوزه رينده سئوسم ده هئچ دولاشماميشام . يول لاري ، گؤرونمز روحوم دان اؤتوب كئچسه ده آياق لاريم هئچ اورالارا باسيلماييب . گؤره سن نئجه ياشايير ليل آخماز چاي لاري  و اؤيله جه گؤره سن پنجره لرين نئچه آچيلاجاق يئري وار اورادا  . ايشيق ساچيرمي چيين لرينه قيزلارينين و قورو آغاج لارينين آياق لارينا  قان داميرمي بعضي سحر لر . اوزاق لار ، اوزاق لار  سوكوتو بويالي ، سس لري و هاي لاري  قولاق لاري اوخشارجا سينا و هئچ گونو صاباحينا اوخشامايان اورالار . . .

ديزلريمي قوجاقلاميشام ؛ قاپيدان هاچانسا كئچه جك دييه او فلامينگو لار قاطاري ، تيكميشم باخيش لاريمي هاوايا ، اونلاردان گؤل لره سالام گؤندره جه يم . كئشگه حايات يازيلماميش شعرلريم كيمي ماوي اولايدي ، بو سئودا منيم اولايدي . و بيرده تاپايديم  ايتيردييم مكتوبلاري و اوزه رينده عونوانلاري . اوزاقلاردا هاراسا آخان گمي لرله من هئچ باتماميشام . يئلكن لر روحوم دان اؤتوب كئچسه ده بئله هئچ اليم توخونماميش كولك لرينه . گؤره سن پرده لري چكير گور ياغمورلاري سوزه جه يم مي يئنه و شه هر گئجه لرينده چيلغين ماهني لار اوخوياجاييق مي سؤنوك ائولره . حايات بيزيم دير، بوتون اوره ك لرين، بوتون دؤيونن اوره ك لرين . ايسته ر اوزاق لاردا ،  ايسته رسه ائله بو ياخين لاردا اولسون . . .