آي بوياسي

الينين ايشيقلي بارماق لاري سؤنوك بارماقلاريما دولاشاندان حياتيمين اسكي دفترينده ورق لر سطير – سطير  يئني سؤزجوك لره دولور  و  دولو سسين دايانمادان  مني چكير اينجه ماهني لارين هانسيساخاطيريمه جالاديغي بير اوزاق خاطيره نين چؤللرينه . هاوا آغير اولسادا بئله سنين قانادلارجا يونگول دوشونجه لرين سئحيرلي خالچا كيمي مني آپارير ، ان سئويملي حياتا دوغرو . من داها آزادام . روحومو بوراخديم اؤز باشينا چيلپاقجاسينا ! آمما هاراييم دا وار ! بو هاراي سن سيزليين قورخوسونداندير بونجا . . .

 گؤره سن  ايندي بو آن هارداسان تومورجوق بنيزلي قورتاريجيم . منيم ال لريمي سوكوتا قويلاماق ايسته ين بير خوخـــان وار بــــورادا ، جيــجي لريمي سينديرماق ايسته يير ! بلكه يئنه گله سن . يوخسا آي بوياسي ني يوخوسو قاچميش اوشاق لارين اولمايان اوتاق لارينا كيم چكه جك ! كيم قوجا ديوين ناغيليني اوچوقلايان گئجه لرده بيزيم اوشاق اوره ييميزه دانيشاجاق . بو اؤز باشينا روحوم  بيليرسن كي نه لرين يورغونودور ! و بيلير سن كي نئيچون دورمادان ماوي ليك دن دانيشير .

نازليجام ! سني دوشونر كن من آزاد اولورام ، يانيمدا اولسان دا سني آراييرام اولماساندا . من بيردن او قده ر شئي ايتيرميشم كي ، قورخوم بونداندير ! آرخا كوچه ميزدن توتدو ، سن بيتن يوكسك ليك لره دك شعر يازاجايام ، يازاجايام كي من سنين سئوگينده تانريني گؤرموشم ائله بو كور گؤزلريمله و ماهني سيني تورپاغا اوخوياندا ائشيدميشم ائله بو كار قولاقلاريملا . منيم دفتريمين يئني سؤزجوك لري ، تومورجوق بنيزليم ! من سنينله بوتون بند لردن  قورتارميش بيريسي يم .