. . . آجــــی دا   اولـــــسا . . .

عاغلیمدا دولاشان چئشیدلی  سورغولار  توکنمز احتراص لار و چاتدیغیم و چاتمادیغیم ایستک لر و سؤنموش سئوگی عوصیانلاری هامی و هامی کول قالاغینین آلتیندا اود شعله سی کیمی یئنی دن باش قالدیرماق ایسته ییر  و یئنی دن . . .  بیر جیغیرا یول کئچیر خیالیمین ان سینمالی بوجاقلاریندان اوراکی اورادا یالنیز بیر بویاسی توتارلی نین آیاق لپیرلری   کؤکسه تاخیلمیش فخری مدال لار کیمی غرورلا دورور . او آددیملارین او اونودولماز آددیملارین مؤلیفی او کیمسه دیر کی من اونو دوشونر کن داییما سینیق لاریما  توش گلیرم . او سینیق لاردا کی عاغلا باتماز یئرلر دن  کئچمیشم الیمده بیر تولوق سو . هئچ بیر  چیچه یه احتیاج اولمادان  ! آجی  اولسا  بئله  یئنه گئتمک اینجه اولای دیر و یئنی لیک دیر ! آدینا قوربان او قاییتماز یوللارین ! نئجه ده دوستاغی اولدوم بو دنیزسیز شه هرین ! کاش آیا باسدیریلمیش او ایکی چاخیر کوپونو دایانمادان باشا چکسیدیم ! و آدینی اؤیرتدییم دورنالاردان سنه یازدیق لاری سمفونی لری دینله یه بیلسیدیم  ! آجی دا اولسا یازی ماسامین داشلی اوزه رینه سرمیشم گؤزلریمی  . آخی بو آن گلسه ده نه دادی  دقیقه لرین ! ال لریم فواره تک  آچیلمادان   من نئجه دییه بیله رم کی  سئویرم  ! و کوچه میزده اسمیرسه  امید آدیندا بیر ایلیق کولک و اوشاقلاری باغچامیزین دره بیلمزسه هله بیر آلما بئله  بس من نئجه سئوه بیله رم . قوی بؤیله سینه  بئزیم  بو قیسا یوللاردا گئدیب – گلمه دن  . . .

آمما  او بویاسی توتارلی نین آیاق لپیرلری اولماسایدی و اینانماسایدیم کی هاچانسا آلما دره جک اوشاقلار  او زامان سئومزدیم  او چاخیر کوپ لرین . منده دایانیق وار. من ماویجه سینه دؤزورم !  خیالیمین ان سینمالی بوجاقلاریندا   من اینانیرام کول قالا غینا   !