اوزاقلارا گـئتــــسنده‌ !

بيتگي لرين رؤياسيندان اؤتدوم ، واااااي تاماشا  قيل   ! تارلا دا سن ، اوچار دا سن  ، اويوق دا سن سن ! ايندي بيليره م كي پنجره لر پرده لرله دونيا گليرميش لر و منيم ايتن بير خاطيره مين كيمسه سيله  كوسمه يه هئچ اختياريم يوخموش . سن منيم دفتريمه بير باخ  ، منيم آتيلميش اوشاق لارا هئچ بير يازيم يوخدور! اونلار كيمي بير سحر مني خيابانلارين بوشلوغونا بوراخدي سئوگيليم و دونيادان اوزاقلارا گئتدي ، او گئتدي ،  هئچ من اونو اولدوقجا تانيماميش ، هئچ من اونو دويونجا سئومه ميش ؛ او مني خيابانلارا ، او مني  ياد وارليق لارا  بوراخدي گئتدي ! من نه تارلا  نه اوچار و نه ده اويوق  اولدوم ! بيتگي لرين رؤياسيندا دولوخدوم . نييه بؤيله اولورموش سونو ماهني لارين !   ا . . . ي  خيلاصكاريم ! يوخلوغون،  بوش بوزقورلارين سونسوزلوغودور و بيتگي لرين رؤياسيني سينديراجاق دير گولوش لريندن اوزاق اولماق .  ال لريمي سيخ ! الريم  اوچوشا محتاج دير ! بو يوخسول ، بو دانلاقلي گونلرين  واخت  قبريستانليقيندا ،  گيله – گيله  بويامي  ايتيريره م . سن كي ايندي گؤي لريمين  جاذيبه لي قورشاغي سان ، گوزگولريمين توزونو بويالارينلا  دَه ييش و مني قورتار خيابانلارين بوشلوغوندان  ! اوزومو پنجره لره توتموشام . بيليره م بورادان كئچه جكسن بير واخت و مني دانلايانلارا گؤسته ره جكسن كي گؤي و گؤل دورنالارين دير و  ال لريمي سيخاجاقسان ! يوخ ، يوخ من سني تانيير ميشام ، من سني سئويرميشم .سن آزادليغين اؤزوسن !  و ساكيت دونيانين دامارلاريندا آخان دوشونجه  سن ميش سن ! من هئچ نه ني  اونودماميشام  لاپ ، سنينله ياشاماديغيم آنلاري و لاپ سنينله ايچمه دييم هاواني ! سنين هله يوخلوغون اؤزو بير قورتارماز وارليق دير و گؤرورسن كي اوزاق لارا گئتسنده من ، بيتگي لرين رؤياسيندان اؤتميشم . سنينله و سن سيز من تارلا ، من اوچار ، من اويوق اولماسام دا من تارلا ، من اوچار ، من اويوغام !