سيــــــنيرلاردان آشــــــــــاراق !

 من هله ده اوشاغام ،آرخادا قويدوغوم اوزون و آغير ايللرين هله سيلينمه ين توز تورپاغينا باخميياراق من هله ده  يئرييه بيلميره م ! الوان اويونجاقلاريم وار و بير ائوجيييم ! عاغليمدا بير يول اوچوردوغوم و داها هئچ واخت يئره ائنديرمه دييم بير ماوي اوچورتما مني هميشه اوشاق كيمي بسلر . اوتاقلاريميزين و كوچه لريميزين و خيابانلاريميزين سرت و سويوق دوشونجه سيله اويارليغي اولمايان بير جان سيخيجي اؤيكو اولسا بئله حاياتيميز . داييما مني بوتون تلفون لارين قارشيسيندا مات قويان و آغير بير سورغو ايشاره سي بئينيمدن آسان بير چاتيشمامازليق  گولدورمه دن ، گولدورمه يه و آغلامادان ، آغلامايا يؤنلدير. ايندي من ايللرله ايسلانديغيم ياغمورلاردان سونرا نئجه قورويا بيله رم ! دوشمه دن يوللارا ، نئجه چاتا بيله رم اوزاقلاردا سايريشان ماياق لار اؤلكه سينه ! اؤز‍ اليمده اولسايدي گيلاوار كولك لرينه  قوشولور دايانمادان اسرديم . اؤزومله  اولسايدي،  بير داش اولوب ديواريندان اوچارديم ، داغيلارديم ! آمما بئله ده اولماسا نه ياخشي كي  بو سرت خيابانلاردا هله بؤيومه ديم و يئره ائنديرمه ديم هئچ  ماوي اوچورتمامي ! سلام اسكي سئوگيمه ! او كي  ، سينيرلاردان آشاراق تامام دؤيونتولريمي قيرميزي خط ايله ، يازدي بوتون  خيابانلارين گونئي سيرتينا ! من بونونلا اؤيره نديم كي سورغولاريمين نئجه ده ساده جاوبلاري وارميش ! وبئله يدي كي قوجالديقجا اوشاق قالديم . هميشه گئجيكسمده ،  اوياق ليق لاريمين هاميسيني ييغديم بير يئره ، بير قيسا درام ليق يوخودان باشقا بير شئي گؤرمه ديم . آمما يئنه ياغمورلارا قوشولوب ايچدييم آندي اونوتما ديم! اوشاق اولسامدا ، آرخادا قويدوغوم اوزون و آغير ايللرين سيلينمه يه ن توز
، تورپاغينا باخميياراق ، مني آلدادان قارانقوش لارين هاميسينا، گلن ايلك باهارين خبريني اؤزوم وئره جه يه م !...