Ⅶ بــير مـــــــكـتوب كـيمــــي

گونلريمين بير آلاتورانيندان سيزيرام . يئنه پالتاريما دولورام ./ آياقلاريمدان اؤتوب كئچه ن يوللار ، عاغليمدا ./ باخيش لاريم  داغ باشماغيما دولاشير ؛ ايزي  قاياليقلاردا مامير ايزيله اوست – اوسته دوشن باشماغيم ! / -  گئتمك -  سؤزجويو ايشيق سيم لريندن ياغيش كيمي تؤكولن قارقالارين زارينتي سيندان قوپور ، داغيلير قولا قلاريما ! / آنجاق چاتلاق گولدان لاردان باشقا سؤز ائشيديرم : « هارا گئتمك ايسته يير سن ؟هر يئرده  بوز كيمي شوشه لردن دوزه لميش داخماجيق لار چيخاجاق قارشينا !/ آنجاق اونلار هله بيلميرلر كي من اؤزوم بير پارچا بوزام ! ارييب زامانا هوپماق ايسته ييرم / اؤتورم ال چاتماز نارلارين پارتلاق قابيغيندان  . ميرواري كوپو دورلر ائله بيل ،  منه داد وئرمه سه لرده ، كولك لر شه هرينده  بير شفق بويالي قيزين بويون باغيسيني ياديما ساليرلار،گنج لشيرم / گؤزوم ديواردا سوكوتا دالان  باشي  هندسه لي بير هؤرومچه يين تورونا دوشور ؛ چتين ليكله گؤزومو او دهشتلي ! توردان قورتاريرام ./ منيم دالدالاناجاق يئريم هارادير بس !/ قلميمه سؤيكه نن يازي ماسامين رويالاريني كاج لارا تيكيره م ؛ بو دوشونجه روحومدا داييما فيرلا نير؛ هرنه يين آديني ده ييشمك اولسايدي كئشگه ! ./ آلاتوران سونا يئتمك  ايسته يير ، آنجاق گئده جه يم ، آيسبرگ لري گؤرمك منيم ان ايلكين حققيم دير ، آغ آيي اولماسام دا بوزلو بولودلار آلتيندا ياشماقدان هئچده قورخمورام . منيم بو توزلو گونش دن زهلم گئدير ./

پستچولارين يولونو داها گؤزله مه يه جه يم ./ ايستي گؤروش لرين ديله يي ايله يولا دوشورم . گؤروشمك  ! و فلسفه و ادبيات و سئوگي دانيشيق لاريندا  محو اولماق . پالتارلاريما دولموشام ، يئنه اؤته جك يوللار آياقلاريمدان . باشيمدا ماوي بويا ، بير مكتوب كيمي اؤزومو دونيانين بوتون آدرس لرينه پست ائله يه جه يم .