Ⅶ نئچه قيش اؤنجه

. . .  قار ياغير ، قار ياغير !  ياديما سن و بيرده كي آرخا قونشونوزون ائولرينين سؤكوك تاواني ، دوشور . بيليره م  بو گونده سن قيرميزي شاپكانيني گزه جكسن و ماوي رنگلي پالتوويني . قارا چكمه لريني گئييب قار توپو اويناماغا قاچاجاقسان ! ياديما قاردان اؤترو سئوينجين دوشور ائله جه ده  قاردان آجيغي گلن چكمه سيز اينسانلارين قاش قاباغي ! سيجاق و آغ بويالي كامپيوتر اوتاغيمدايام ؛ تله سيره م كي بو يازيني قورتاريب وبلاگيما قويوم ! كئبارييانين « منيم درديم داغلار قـه ده ر » ماهني سينا دولاشان دويغولاريملا پنجره دن قارلي  ائشيگه دوورورام . نئجه سيجاق اولسادا  اوتاغيم  گؤزلريمين پرده سينه  ، كوچه ده زيبيل كارتن لاري جمع له يه ن نئچه آزياشلي اوشاغين تيتره ك ال لري ساريلاركن دونورام ...

قار ياغير  قار ، ايچيمه ياغير !  عاغليما سن و بيرده كي او كؤوره ك روحونون  آغ آپباق دؤيونتو لري دوشور ! نه قه ده ر بو دؤرد دووار آراسي ايستي اولسادا  اللريمي اؤوكه له ييره م ! 

قار ياغير قار ! بيلميره م ،  ياديما سن و بيرده ، بيردن بيره  يئني جه ال دن گئتميش دوستومون  گرانيت مزاري دوشور !  آشاغي دان اوچان كؤچري قازلار اوزه ريمدن  اؤتوب  بورانلي اوزاقلاردا ايتيرلر ؛ اونلارين کوچری  روحلارینا دالیرام  ياديما داها بيرده راستلاشماياجاغيم ايتميش هئيكل لر دوشور !  گيله –  گيله  ياغيرام  سؤنوك سؤزجوك لره  اليمدن بير ايش گلمير و  دايانمادان دئييره م كي كئشگه  ،  كيپريك لريمدن  آسيلان تابلووداكي قيزجيغاز كيمي  كپه نك لردن بير باشا  اوچماغي  اؤيره نه بيليرديم  و بو آن  سن  دوشورسن آي رسمي كيمي ايسلاقليغيما ! نئچه قيش اؤنجه ،  قيرميزي شاپكا باشيندا ، اينينده ماوي پالتوو و آياقلاريندا قاراچكمه لر. ياديما گولوش لرين دوشور ، كوچه ده  زيبيل كارتن لاري جمع له يه ن اوشاقلارلا قارتوپو اويناياركن . . .