Ⅶ    يئلــكن روحلو  . . .       

پرده لری کنارا چکیر پنجره نی آچدیم . یئنی قيرميزي هاوا دان دولدوردوم سينيق جییارلاریمی . حیات مئه کیمی آخدی دری لریمه . ایندی ایچیمده بیر انگين هیجان وار . اوخوماق ایسته ییره م ان چتین دیل لرده ، زیتون یارپاقلاری بويادا بیر شعر . یالنیز یئلکن روحلو بیر یولداشیما . او شعر بودور : اوتلار دووارلاردا  بیتمز و کؤلگه لر نفس چکیر . قارشی دا  رقص ائله ییر  اؤلوم  . سن ساکیت اول . پلمه لر ده آغلیق وار و بوتون چکیلمیش رسیم لرده زیتون. بو گونوده سایسانیز بلکه مین ایل دیر کی من پنجره لرده کی هیجانلاری یاشاییرام . منیم آدیمی هله قویماییب لار . من یولام ، بیر دمیر یول . منی تاپدالییاجاق قاتاریمی گؤزله ییره م . یئنی یاغمورلا دولدوردوم جییارلاریمی . هئچ ياندان گلمه يه ن  ماوي سس نئجه ده گؤزه ل دیر گورولتو ایلدیریملارین قورخولو سسی کیمی . من اؤلدو م دووارسیز ائولردن اؤترو . بوغاناق وارسا ، من بوزلار کیمی  سویوق ساچماق ایسته ییره م و حیات بیلیره م کی  بیرگول پنبه دیر. حیات داشلار کیمی گؤزه ل دیر و من زیتون یارپاقلاری رنگ ده بیر شه هر آرزوسوندایام . گل ماسام آرخاسیندا اوتور، اوره ییم  و قلم لری بیر لیوان سویا قوی . رنگ لر داغیلاجاق .

من نئچه ايل دیر کی  بوش – بوش واراق لاری ترجومه ائله ییره م . سئوگیمی  قوروموش بیر بوغدا یارپاغی کیمی يازماديغيم بير رمانين آراسيندا ساخلاییرام و اونودمامیشام کی من شاعیر دئییلم.   مایاق سیز بیر دنیزده ، من یولونو آزمیش بير گمی یم . آنجاق هله پرده لری کنارا چکه بیلیره م . اوزاق لاردا زیتون یارپاغی رنگ ده بیر سئودام وار، من اونونلا بیتیره م . اوزه ریم دن قاتار کئچه جکمی گؤره ن !