Sətirlərin maviliyində

X

Sətirlərin maviliyində

Sətirlərin maviliyində

ərəstu mücərrəd


حؤرمتلی اینسانلار ! سئویملی دوستلاریم ! اومید ائدیرم هامینیز چون ایل یئنی و قارشی دان گلن مؤوسوم ، باهار اولسون ! و روحـــــــونوزا یاراشســــین حایاتیــــــنیز ! صمیمیتله Hörmətli insanlar ! sevimli dostlarım! Ümid edirəm hamınızçün il yeni , və qarşıdan gələn mövsüm , bahar olsun ! və ruhunuza yaraşsın hayatınız ! Səmimiyyətlə
+ یازیلمیش دیر چهارشنبه 29 اسفند1386ساعات 3 بعد از ظهر ə . m \|


پوزدوم تامام جیزگی لری 1 . . . سنه اینانماسایدیم منه اوزاقلارداکی میرواری لر اینانارمی دی ! سنه یانماسایدیم ، گونلریمین بو توتقون قارشیسیندا سؤنوک اومیدلریم یانارمی دی ! بونو بوتون افسانوی آنی لاریمیز دا بیلیرلر . دولاشیرکن یاد اؤلکه لری بئله ، سندن سنه یازدیم داییما ، و یازدیقلاریمی ساویردیم تانیدیغیم و تانیمادیغیم هوندورلرین دویغولارینا . مندن اولسایدی رسمینی بوتون یوللارین باشلانقیجیندان آساردیم ، و قورتولوش اییلی سسینی بوتون ماهنی ائشیدمه ین قولاقلارا باغلاردیم تانا کیمی ! آنجاق یازیق لار ! بیز هارادان باشلامالیدیق سحرلره وارمادان و هله اؤنوموزده ایتن یاشسیز مؤوسوملرین دادیلمایان سئوگیسینده آجی لار واریکن ! بیلمه میشدیک قارشیمیزدا سایسیز اوچوروملار بیته جک و ائله اولاجاق کی اوچارلارین سؤزوندن چیخاجاق یاسمن لر ! 2 . . . نئجه یازا بیلیردیم من ، سن اؤیرتمه سئیدین ! نئجه اوخویا بیلیردیم من ، سن ماهنی لانماسایدین ! بئله ایدی کی آرخالاناراق قایالانمیش هئیکلینه ، پوزدوم تامام جیزگی لری و کئچدیم سینیرلارین هامیسیندان ؛ بوتون آدلاری سویونارکن ،چیلپاقجاسینا تکی اؤزونو سئودیم ! ایندی من اوره یی دولو اینانجلارلا زنجیرلری سؤکولموش بیر قورتاریلمیشام ! آلقیشلار سنین بونجا ماوی قالدیغینا ! حایات گؤزل اولسادا ، اولماسادا سن ، زیتون بوداغی تک سئویلمه لی اولاراق قالدین و سینساندا بعضاً ، دوشمه دین جیلیز دوشونجه لرین هرزه درین لیینه ! نازلیم ! اؤنونده باشیمی ایمیر ، اوجا توتورام غرورلا ، بونو منه سنین آزاد وارلیغین اؤیرتدی ! سن کیمسن ! یئر اوزونده ان ساده بیر اینسان ، او تانری کی هئچ واخت کیمسه یه وارلیغینی سئودیرمه دی و الینی اؤپدورمه دی . . . Ⅶ آردی ---->
+ یازیلمیش دیر پنجشنبه 23 اسفند1386ساعات 3 بعد از ظهر ə . m \|