Sətirlərin maviliyində

X

Sətirlərin maviliyində

Sətirlərin maviliyində

ərəstu mücərrəd

	yağışın səhəri
ياغيشين سحري سئرچه لر بیزدن قورخوردولار ، اونلاردان قورخموردولار ایت لر بیزدن قورخوردولار ، اونلاردان قورخموردولار ، پیشیک لر بیزدن قورخوردولار، اونلاردان قورخموردولار ، اینسانلار بیزدن قورخوردولار، اونلاردان ... ! من سئومه یه گؤره آدام اولمالیدیم ، و سئومه میشدن قاباق خیردا آدیمی گئجه کانسئرت لرینده باغیراراق گنج وندالیست لر اسپری له داما دووارا یازمالیدیـــلار . Ⅶ آردی ---->
+ یازیلمیش دیر یکشنبه 24 آبان1388ساعات 4 بعد از ظهر ə . m \|

	gecə yağışından qalan su
دوشوندوکجه دوشدوم . هارا گئدیرم هارا گئدیرسن هارا گئدیریک، هارا گئتدیلر هارا گئدیرلر هارا گئده جک لر ! آخی دنیز ایندی لر چوخ ماوی اولمور . و بو گونلر یئنه گونلرین رنگی سارالیر ساعات ، ساعات . تانری یئره گلسئیدی بیر آخشام و گولدانلارین زیان ائتدیینی سوزسئیدی کاش ، بیر آز سوساردیم . وئجیمه اولماسادا توزلو خییابانلار، بوش اوتوبوسلارا نئیله یه جه یم ؛ داشقالاق اولموش گنجلیین گلینجیینه نه . اولانلاردان اوزاق دانیشیرام من همیشه ، اودور کی مندن اینجییر اوزو بری باخمایان یوللار . آمما اونلاردا بیلیر کیمسه منیم دک و آغیز بوغوز بیر بارداق قارا شراب دک تانیمیر هله اسیمی یؤنسوز یئللری و باشیمین بلاسی دا ائله بودور . چیلپاقلیقدان هورکن شه هه رین بؤیوک قاپیسین آچماق یالنیز چیلپاق دیولرین ایشی دیر . ایشیق آغاجلارینین باشی آغرییا دوشنده قارانلیغا دوشور کوچه لر و بونو نه یوخاری خییابانداکی لار نه ده چوخ واختی آشاغی دا کیلاردا سایمییر ، باخما ، من اوزومه سالیب باغیریرام یوخسا قارقالار خبرین نه اولدوغونون فرقینده بئله دئییل لر و حیات همیشه گؤزل اولمور ، قوی منی قیناسین آغالار ؛ زور دئییل کی من و باشقا آلاقلارا همیشه گؤزل دئییل . بارلاردا ماتیک لرین ایشیغی گؤزه دوشـــن کیمی گؤزومه دوشور بیلینمز اؤنده کی سئومییه جک لریم و صاباحلاری اؤلسمده اؤلمسمده مین ایل اؤنجه و مین ایل سونرانی یاشایاجایام . دوغرودور ایندی اؤزومو تئز، تئز ایتیریرم یادیمدا بیر شئی قالمیر و دؤزه بیلمیرم هر نه یه آمما بیر جه یول اؤزوندن سوروشمادین کی نه گلدی بونداکی پولاد عصب لره . هانی او پولاد عصب لریم و ساوالانی ، سهندی ، قاراداغین سیرا داغلارینی سینیرلریندن اؤتوردویوم دمیر آیاقلاریمین گوجو . نییه توکندی تئز ، نه تئز ! گؤز قیرپیمییجا سئویشمه دیک هئچ او اؤزوموزه ساخلادیغیمیز آیی ماغاراسیندا . داش دوشدو چولایا و من ساندیم کی اورادا گئجه یاغیشیندان قالان سویا دوشموش آی داغیلدی ؛ آمما دئییل ، دئییرلر آی یئرینده دیر ساده جه بیر آزدان داشلار بوغولاجاق دیر . نه سئوینمه یه ده یر نه ده آغلاماغا ، دیوارلاری باشیمدا اوچورمالییام ، دئییلسه قالسالار یاخشی دیر . هارا گئتدیلر ، هارا گئدیرم ! رنگی قارالیر ثانیه ، ثانیه قانیمین و شه هه ری ائولرینه اوخشایان اوزاقداکی اوزجه بنزرلریمین قیرمیزیلیغینی دوشونورم ، خولیالارینین رنگینی . من ندن تاختا ائولرینین آرخاسیندا سامان تایینین قیراغیندان اؤتن الی وئدره لی ریز گوللو چیت دون گئیمیش ساری ساچلی قیزی اوشاقلیغیمدان هله ده اونودا بیلمیرم ! او ایندی هاردادیر، آخی اونو بیر دفعه ده 28 مای مترو ایستانسیاسیندا گؤردوم ! توزلو خییابانلار ، بوش اوتوبوسلار ، هورکن شه هر ، اسیمی یؤنسوز یئلل لر ، گؤزه دوشن ماتیک ایشیقلاری ، هارا گئدیریک . ا...ی پولاد عصب لریم ا...ی دمیر آیاقلاریم دوشوندوکجه دوشدوم .
+ یازیلمیش دیر سه شنبه 7 مهر1388ساعات 12 بعد از ظهر ə . m \|

	Mən səni etiraf elədim
دانیش ! ناغیللاریمین اؤزو . یاغمورلارین ایلک دامجی سی! قانیمین بویاسی دانیش !؛ بیلیرسنمی گؤتوره جکلر منی ، بیلمیرم هارا ! آنجاق ، دئییرلر یوللارین اوزونلوغوندا الین وار . گونلریم آغیردی چوخ دایانا بیلمه دیم ، دئمه لی من سنه ، آزادلیغا و آناما اعتراف ائله میشم ! بیلیرم منی آپاراجاقلار ! داغچی سئوگیلیم ! بیلمه دیکلریمدن یارانان یارالاریمی یوروشلرین ده یه نکلرینده توخدادیم و تؤکولورکن دیرناقلاریم اونلاری سللولار باجاسیندان بویلانان داغینیق آی ایشیغیندا قیزدیردیم . اونلارا دئدیم سن سون گئجه مین آنلامی و تر کؤرپه اوتلارین دوشونجه سینده گؤیه رن ماوی خاللی کپه نه ییم سن . من سنی اعتراف ائله دیم ؛ بیر یول قیروولو گونلرده باغرو سیرا داغلاریندان آشدیغیمیزی . سنه بیر یول مکتوبومون بیرینده گونشین سویوقلوغوندان دانیشمامی و شور سمفونیسینه قولاق آسارکن باشیمیزین توکلری بیز بیز دوردوغونا اعتراف ائله دیم . گوناهیم آغیرسادا ایندی باغیشلامامی دیله ییرم ؛ من سنی سئورکن چوخ اینجیتدیم ! قاشلارینی آلدیر و ساچلارینا شرابی رنگ قوی . اونوتماکی دئییبسن :" سن اؤلمه یه جکسن منده " ! . سنی ، آزادلیغی و آنامی سنه تاپشیریرام
+ یازیلمیش دیر چهارشنبه 11 شهریور1388ساعات 9 قبل از ظهر ə . m \|

	Boyalar rəqsi
توتوشور اسكي مزارلارين آدسيز باش داشي كيمي گلن گونلر، عاغليمدا . آنلام ايتير شيشه بينالارين اؤرتولو پنجره لري آرخاسيندا و تپه لي كندلرين يانار ياماجلاريندا ساخسي كوزه لرين عؤمرو بوشونا اؤتور . نه قويو نه ده كي سو . سؤنور بو يوللارين يالنيز اولدوزودا و قيرميزي دنيزين دالغالاري سوسور . كيمه سؤيكنه جك بو كولك لر ، ايندي كي ايتيريلميش توفنگ لرين ته تيك لري چكيلمييه جك بير داها و آتيلميش سئوگي ، يوللار آيريجيندا بؤلونه جك . توتوشور اسكي مزارلارين آدليم مئييت لرينين هايي باشيمدا و دولور هاوالاري يالين آياقلاريما . قاچيممي اؤزومدن يوخسا پلاژلارين سئوينج كؤپويو پوسكوره جك صاباحينا ، دايانيممي . دئييل ، من اينانماميشام بويالارين آلوولو رقص ائله مه ديك لرينه ، من اينانماميشام بولور سسلرين ائنديكلرينه . سؤنرسه ده ياپا يالنيز اولدوز و سوسارسادا قيرميزي دالغا لار يئنه قيزاراجاق باتي اوزاقلاري و ته تيك لر چكيله جك شار توپلاري هاوايا آتيليركن سئوينج پارتلاييشيندا . باخ پلاژلار كؤپوكلنير و بويالار رقصه گلير ، گؤرمورسن ؟!
+ یازیلمیش دیر جمعه 23 مرداد1388ساعات 12 بعد از ظهر ə . m \|

	Mənə heçnə oxumayın
من نئجه بؤیله سینه یاشایا بیله رم ،ال لریم منه قاناد اولماسا . من نئجه بو قانادلاریملا اوزاقلارا اوچارام ، سئودا باشیمدا فیرلانماسا ! ال لریندن سحرین بویاسی ال لریمه سیزیب ، بو منیم توکنمز خزینه م و هئچ نه ییم اولماسادا بو تاختا تاباغا وورغون بنزرلریم آراسیندا ، من سانیرام کی بختیارام ! من وارلی یام ! کؤکسومده بیر صمیمی آتش وار و منه سئوگیلیم دن قالان ان عزیز قم لر ! نییه سوسوم ، نییه دایانیم ، ایچیمده آخیرسا ماوی ایرماق لار ، ايچيمده واریمسا دوستلاریم ؛ اؤزوده هر بیری بیر چینار ، هر بیری بیر روزگـــار! واااای من دوشونه بیلمه سم سون سوز چؤل لری اؤله رم ! قورو بوداقلارا الیمی چکمه سم و حسرتیندن اؤلمه سم سئوگیلیمین، اؤله رم ! منه هئچ نه وئرمه یین من ، اوفوق لارا گئتمک ایسته ییره م یونگولجه سینه . منه هئچ نه اوخومایین ، منیم منی دویوزدوران آتشیم وار !منیم منه تانری بسته له ین ماهنینی اوخویان بیر نغمه کاریم وار . من نئجه یاشارام کوسسه مندن تورپاق یوللار ! کوسسه مندن چؤپ یووالار ! من کندلی بیر قیزین سهنگیندن سو ایچمیشم و جیغیرلارا دولاشارکن آدلامیشام بير آياق باسيلماز زیروه نی ! دوستومون آدینی دیرناقلاریملا داشلارا یازمیشام و ال لریمی بیر دورنانین یارالارینا قویوب آند ایچمیشم : دیوارلاری هئچ واخت سئومه یه جه یم . . .
+ یازیلمیش دیر دوشنبه 22 تیر1388ساعات 3 بعد از ظهر ə . m \|

	çilələr qafanı titrətməzsə
قيزجيغازيني ايتيرميش گلينجيك آرزوسو كيمي ، داملايا بئله چاتماز دوزلاقلارين آرزوسونا وارديم ، شيرين آنلار هوپدو خوليالاريما . هر يانيني سو سارميش آدا گؤردوم ؛ ترك ائديلميش گمي نين ، شعورونداكي لپه لره دالديغيني و اوزاقلاردا سينماغا گئده ن يئكلميش قيزجيغازي گؤردوم اللري دولو باليق قولاغي ، او دوزلاقليغي سيغاللاييردي ! قولاي دئييل سينماق ، آدينا كئچمزسه گوزگولر اونو ! قولاي دئييل گؤرمك ، دارليق سينمادان باخيش لارينين آرخاسيندا ! گئتمك ده بو كيمي بير دئوريلمك ، آياقلارينلا دوغولان قانداللاري ازمك قولاي دئييل ، قــــولارين اوچوش هيمني يوخسا ازبرينده ! دورا - دورا سوزمك و اوزاقلاري كئچيرمك عصب لريندن ! بو پولاد سينيرلردن نه اوجقارلار اؤتموش و نه سينمالار كي هر بيري بير سئودا قه در گوزگو ! من سئودامي دووارلار آراسي دئييل سونسوزلوغا بوراخديم . او منه آنلاتدي كي چپرلر ماهناديرلار و روحوموز آزاد . منيم دادلي سئودام بؤيله بوياقلي ! آغ دئييل ، قارا دئييل دوز ، گونلرين قاچميش رنگي كيمي نغمه لي . چيلپاق دوشونجه لرينه ، داشلارين اورتاسيندا رمان يازيرام ، سؤزجوك لر يئتمير . يئرين بيلميرم نئچه اينجي قاتـــي دير نه نپتون نه پولوتون نه شئه ونه باشقالاري ؛ يالنيز سن وارسان و بيرده من، سونسوزلوغونون رسميني چكيرم هئچ بير يارديم گؤزله مه دن هئچ بير قلمه ساريلمادان . يئر بوي دا داشلار آراسيندا داغينيغام . بوراسي هارادير ! نه سويوق نه ايستي ، دوز بيزيمله دويغوسيز "جانلي " لارين آراسي كيمي ، يعني اينكار ! قـولاي دئييل اينكار ؛ آزاد دئييلـسه اينامين . گولمك قولاي دئييل و قـه قـه ده چكمك ، چيله لر قافاني تيترتمزسه . دوشونجه لرينين قات با قاتيندايام ، و رمان يازيرام هيچقيريقلار بوغازيمدايكن ، بيليره م كي آغلاماماق دا قولاي دئييل . سوسورام ؛ سولاردان و ژورناللاردان اؤيره نديم كي سن فيدانين اؤزوسن ! و دايانمادان آختاريليرسان بوتون ايتن كيتابلارين موسيقي سينده . . .
+ یازیلمیش دیر جمعه 12 تیر1388ساعات 12 بعد از ظهر ə . m \|

	güldanlı körpülər
توكنمه دي مي بو يوللار و يورولماديمي آياقلاريم ؟ چاتماق يوخسا چاتماماق ! نه بو يوللار بيته جك نه ده يورولاجاق بو آياقلار ! قيزيشارسا قيشلارين سرت ليينده و تيتررسه ده ياي لارين يانار آيلاريندا . نه اولور ياخين لار اونودولدوقدا و اوزاقلارين آرديندانسا بير خبر گلمه ديكده ! گئدرليكده ايسه قاييتماق ديله يي و قاييداركن گئتمه يي دوشونمك ! و دوشونه ، دوشونه آنلاماماق . بو آخارليق بؤيله داييما بيزه بو باتاقليق بؤيله .سئوگي نه قه در ، و سئودا نئچه نئچه ؟ من و من سيزليك بويدا اؤزوم نئجه . كوللوك و آغ مرمر دوشه لي يوللار . هله ده آلما آخمير بو كايناتين چاي لاريندان و كندلرين يوخوسوندا استراسبورگون گولدانلي كؤرپولري و گويرچين لي كوچه لري يوزومسوز قالير . منيم آديم كئفلي كارئل دير ياشيمسا هله باشلانماييب . گئتديكده ايسه قاييتماق ديله يي مني قايتاريب و ايندي بير داشام من بير يئرده داشام كي ايتي بوراخيب داشي باغلاميشلار ! بو يول توكنمه دي بير يول و من بيرآدام كيمي بير كز اوتوروب اوتوراجاق دا هاوا يئمه ديم . نه يه چاتماق ؟! گرچي جاناندان ديلي شيدا اوچون كام ايسترم / سورسا جانان بيلمزم كامي ديلي شيدا نه دير ! من آنجاق سئويرم ! آنلامييا ، آنلامييا دوشونسمده ! من ديبينه داش آتميشام سئوگي نين . سهنگيم بولاقدا سينيب و قاناديم گؤي ده . تاختا و قيسا ، آرا بير آغ ديوارلار يئنه ده خوشوما گلميرلر ، منيم ديوارلاردان آجيغيم گلير لاپ گرانيت دن اولسادا و بئله دير كي ياخين لار اونودولور و اوزاقلاردانسا ... آغلاماديم هئچ گولمه سمده و اليم اته ييندن چكيلمه يه جك قاتارلارين . سئودانين سونوناجاق گئده جه يم قوي توكنمه سين يوللار ؛ چاتماق يوخسا چاتماماق ؛ دوشونمورم بونو هئچ . . .
+ یازیلمیش دیر پنجشنبه 7 خرداد1388ساعات 3 بعد از ظهر ə . m \|

	şehli güzgülər
سیزماسا بارماقلاریما قادان ! الیم قلم توتورمو هئچ ؟ و یازیلیرمی دؤیونتولریم ؟! اولمازسان ، قاپی د ا حتی هورمز کؤپک لریم و قیشیم قارلاماز. اوزون زامان سوسار جیب ده تلفونوم و پوزولار سینیرلریم .اولمورسان کـــی ، اینانسانا یاتاغیم خسته خانالارا کؤچور، توتار اوره ییم ، آنام آغلار! او زامان ، بوز باغلامازمی پنجره لریم و آمپول لار سؤکمزمی دامارلاریمی ! . . . آنجاق چالیشیرام کی اینانیم . اینانیم کی دورنالار قاییداجاق وتوفنگ لرین لوله سینده هؤرومجک لر تورآتاجاق . بوللو گوله جه ییک و شئهلی گوزگولرده چکدیین کؤرپولر بیزه یول وئره جک . آدینی خیابان لارا دئییل شارقی لارا قویاجاقلار. سن اولاجاقسان و یازیلاجاق دؤیونتولریم و توتاجاق الیم قلم و تلفونوم چاغیراجاق منی . گؤم - گؤی قارقی لار کیمی رقص ائده ن دالغالی ال لرین ، قار بویالی قو کیمی قوناجاق چیینلریمه . سن وارسان ! ائله بوتون مؤوسوم لرین دَییشیکلیینده و قاپید ا هوره ن کؤپک لرین سئوینجینده . سنه نه لر یازاردیم کئشکه بسته کار اولسایدیم . سنه نه هیکل لر یاپاردیم کئشکه باجارسایدیم . ا.....ی فیرتینالاری تئلینه تاخان گؤیسل قیزجیغاز، قاسیرغالارا یولداش اولان شافاق . سنی یولونا سریلن بو یورغون ال لر گؤزله ییر . بیرگه آدلادیغیمیز او قوملو ساحیل لری ایندی بیرر – بیرر تک باشینا دولاشیرام . نئجه یاشارام پارام پارچا ، اولمازسان اگر . . .
+ یازیلمیش دیر یکشنبه 20 اردیبهشت1388ساعات 3 بعد از ظهر ə . m \|


· ائـــشیــدن بالیق قولاغی داش دؤشه لی خییابان کیمی دیر اونون سئوگی و دوشونجه یولو . هم یاراشیقلی هم سئوگیلی . بو یولون یوخوشونو ، ائنیشینی آدلایارکن ، عاغلینا داملاییر عوض سیز دویغولار ، و سن اؤزونو ییغیشدیریرسان ... 199 – جی ایلی اونودمورام ؛ اییرمینجی ان قیرمیزی قرینه نین سون ایللرینی . خزر دنیزینین باغام آغاجلی سوسقون بیر ساحیلینده لئیلک هئیکـلینه بنزه ین بیر قارا کؤتوکچه نین اوزه رینه اَیلــه شیب لپه لری ائشیدن بالیق قولاغی لارینا دالمیشدیم . کسرسیز گونش باشیم اوسته ایشیلداسادا هاوا دوندوروجو ایدی . آنجاق بونا باخمییاراق قیزغین دوشونجه لر منی اوشومه یه قویموردولار . داش دؤشه لی خییابانا بنزه ین او دوشونجه یولو ، ساحیلی دینله ین بالیق قولاغی لاری ، لئیله یه بنزه ییر آنجاق اوچا بیلمه ین قارا کؤتوکچه منی ، اوزاقلارا اوچوروردولار ! باغام یاراپاقلارینین شاققیلتیسی هردن بیر، سوسقونلوغو قاچیریردی . آرخام دا سس سیز جه سینه یوخلوغویلا دایانان بیر ، سس می دئییم یوخسا ، خور ماهنی نوت لاری ؛ - بورخئسین- بو سسيني داملا – داملا منیمله قاریشیق ، قارشیمداکی چالخالانان تابلویا یاغیردی : " زامان و سو جینسیندن اولان بیر ، چایا دالماق ، و یاددا ساخلاماق کی ، « زامان » باشقا بیر ایرماق دیر آنلاماق کی ، چای کیمی اؤز قاچارلیغیمیزدا ایتیریک ، و بنیزلریمیز سویا یازیلمیش ناخیش لاردیرلار . اینسانین بوتون گونلری و ایل لریندن ، هر گونو هر ایلی بیر نیشان کیمی گؤرمک ، او زامان بوتون ایل لرین حیرصینی چئویرمک ، نیشانا ، نغمه یه و ماهنی یا . " میلیاردلار دؤنه دوغوب ، باتمیش گونش او گونو ده یووارلانا – یووارلانا باتماق اوزره یدی . من ، داها او آچمایان کؤتوکچه نین بیر چؤپونو قیریب قوملارا ، داش دؤشه لی خییابانین دویغولاریندان یازدیم : دوزلاقلارین دوداقلارینداکی چات دیر ، سانما گولورلر ! و کیم دئییر بالیق قولاغی لار ائشیتمیرلر ، اونلار هم ده اوخویورلار ! قولاق آسمیشام اؤزوم : یالنیز ماوی لیک دئییل ، دنیزین آلتیندا مینلرجه رنگ وار ، اگر " بنیزلریمیز سویا یازیلمیش ناخیشلاردیــلار " سا ! بو دارغین ساحیلین اوزه رینده اونودولماز مارتی لار اوچوب ، کؤنوللری وارلیغین حرکت شوعورو ! من بونو سئومک ایسته ییرم و اینانیرام کی سو ، هامی دان سونرادا سینمایاجاق ! هر گونوموز سئوگي نين آد گونو ! من دنیزین بوتون رنگ لرینی سئویرم لاپ گؤزومه دوشن ساری رنگینی ده ! آخی من او آرخامدا سس سیز جه سینه یوخلوغویلا دایاناندان ائشیتدیم ، ایل لرین حیرصینی نیشانا ، نغمه یه و ماهنی یا چئویرمه یی ! یادیرغامییاجایام ان قیرمیزی قرینه نین سون ایللرینی و دوستومو اؤیله جه ! داش دؤشه لی خییابان کیمی . بو یولون یوخوشونو ، ائنیشینی آدلایارکن . . .
+ یازیلمیش دیر چهارشنبه 19 فروردین1388ساعات 5 بعد از ظهر ə . m \|


بوگون ده گونشي ، كولك لري، پنجره ني ، ديوار اوسته پيشييك لري ، اوشاقلار مكتب سئرويسيني دويدوم ! بوگون ده تئلئفون زنگيني ، تلويزيون تاماشاسيني ، ايشيق آغاجي اوزه رينده قوجا قارقانيين اسكي ماهني سيني ، تاكسي سيرالاريني و قيريم قيرتي چؤرك آل وئرچيسي يئني يئتمه اوغلانلارين قيشقيريغيني دينله ديم . بوگون ده ، بو گون ده امديم هاواني وارليق دؤشوندن ، يازي لار اوخودوم دويغودان دويغويا كئچه ر ك و بو گون ده آجي ، بو گون ده شيرين سؤزلر اؤتدو دريم دن . بو گون ده ايش يئريم سويوق ، ايش يئريم بوش ، بو گون ده شه هر مني گؤردو ، دوستلاريم دا ، بو گون ده تانيق اولدوم گؤزل قيزلارا ، مئيدان فهله لرينه ، ايفليج اوشاغي قونشوموزدا بوگونده گؤردوم . سلام ماريا ! داريخيرام ، ويزالارا داريخان پاسپورتوم كيمي !
+ یازیلمیش دیر دوشنبه 19 اسفند1387ساعات 1 قبل از ظهر ə . m \|


سس ə.m دولدو هر يانينا سيرا سيرا سويوق نفس كيمي . دورانمادي آرخا پنجره نين باخديغي اوكيانا . سرت دمير كيمي داش باخيشلاريندا اؤلوم دن ساوايي بير قوخو دوغموردو . پارتلاق يولون ياريق ، ياريق ائنيشيندن يورولموشدو سانكي . دينمه دي ، آنجاق قيشلارين بوزلاديغي ، روحونون انيلمزليينده دوندو . يورغونجا چئوريلسه ده بو مؤوسمين ورقلري ، قارانليغي بير قيغيلجيمجا اولسادا داندي . نه او و نه باشيندان ايتمز سئوداسي ،چيله لرين قار اوشقونو قارشيسیندا آمانسيز قورشونلار كيمي ياغماقدان دورمادي ، سس داغيلدي اوچوروملارا و آچدي اوزاقلارين و قورتارمازليقلارين دان كوله يي ساچلاريندا ايليق ، ايليق دئييل قاسيرغا ، قاسيرغا اونون ، منيم و سنين نفس لرينده ده . باليق قولاغي لار رنگ ، رنگ آرخا پنجره نين شيشه سينه دوشورلر ، چيمرليكلرين سرينلييي كيمي ! و بو آن ايستيني دادماق كيمي، سئزمك كيمي بير آخين سوزولور دامارلارا او هر آن واريرسا قاپي دان ! گئتمك هله ده گوزل دير ! و من اوندان ، اونجا بولودلاري خالتالييان گؤزللييندن قاچاراق گئتديم ان اوزاق آدالارين پئشينجه ، كؤپوكلو لپه لرين اوزه رينده اوجالار ، ائنــر مارتي لارين بيلينج لريله . سوچوم بوتون بايراقلاري بير آغ بايراغا كؤچورمك و پارتلاق يوللارين ياريقلاريني اولدوزلا دولماقدي . دولمادي نه ياريق و نه بايراق ؛ سونگو كيمي يانار داشلار اؤتدو قيرميزي گؤي دن و دئپرئم لر ان سئودييم بؤيوك شه هري تيتره ديلر ! نه يازيق لار كي اؤرتولدو رنگ رنگ باليق قولاغي لار شيشه سينه دوشن پنجره لر و اوساندي هاواسي او ائولك لرين ! ايليق ايليق دئييل قاسيرغا قاسيرغا اونون ، منيم و سنين نفس لرينده ...
+ یازیلمیش دیر شنبه 3 اسفند1387ساعات 0 قبل از ظهر ə . m \|


سئودا كؤچموشدو ə.m دینمه ین اوخومايان هئیکل لر کیمی شه هرین اوجا بير تیکینتی سی نین مور بویالی اونــینجی قاتیندان باخيردي ساحیله دیو تک اوزانان شه هرین ، یانار خیابانلارینا . ایسته میردی ، گوز گولر کیمی سینان و داها کسیجی اولان او داغينتيلي کئچمیش و یوخ گونلرین بوش قوجاغینا سیغینماغی . زهله سی گئدیردی نفس دن . بوغازینا دولاشان هیچقیریغی بومبالار کیمی شه هرین اوزه رینه بوشالتماق ایسته ییردی . اوشاق باغچالارینی دوشونه رک آمما سؤنوک بیر سئودا آخیردی بئینین دن اوره یینه . و هئچ نه و هئچ نه روحونو ساكيت لشديره بيلميردي ... باجارميرام دئييردي دوداغي آلتيندا اؤزو اؤزونه ! پنجره سي كيپلنميش اوجا اوجا تيكينتي لري بيربيرنه باغلايان پالتار كنديرلريني دوشونه رك بوغازينا كئچيرميش كيمي خياليندا بوغولوردو ! دونوق باخيشلاريلا كيرلي هاواني ايچه ري چكمك دن ايره نيردي داها . سئودا كؤچموشدو كؤچـَـــبه اوچارلار كيمي اوتاغيندان . ديوارلار دوتساق ديوارلاري كيمي يالنيزليغينا يوروش ائديرديلر و جان سيخيجي ساعات دينقيلتي لاري قورشون كيمي تــپيليردي باشينا هر آن ! نييه دايانميشام و نارينجي باتي لارين آرخاسيندا يووارلانيب ايتميرم . مني بو قارباسار شه هرده هانسي اللريمي سيخاجاق قيزمار اللرين سئوداسي ايسينديره جك . آلت خيابان دا فيدانلار آدلي اوشاق باغچاسي اؤنونده سون كز ائله اوشاق كيمي ايتيرديم باخيشلاريني و بير داها نه سس و نه ايستيلييني دويــماديم بيله اون ايللر سونرا . يئتمزمي ! يئتمزمي سوورولموش او آني لاري هر آن آنماق و اوخوماق كي : گله جك هاچانسا او اورمان ائلچي سي و كردي لريميزده چــــپرلر بيله آچاجاق . ساري ، قونور ، ياشيل ، مور بوياقلاري پارلاياجاق قارا قارا بويالار يئرينه و قيپ قيرميزي گولوش لر هيمني داغيلاجاق دوداقلاريندان يوللاريما ! نييه دايانميشام ! و ندن چيخارميرام بو اوتاقلاري اينيمدن و بو شه هري آياقلاريمدان !
+ یازیلمیش دیر پنجشنبه 10 بهمن1387ساعات 10 قبل از ظهر ə . m \|


سينيرلارين آرخاسي ə . m * بيرحيات يولو ، سان ، او ياريم آدادان قوپاراق منه سني قاتان خزريني اي ، سولاق دا ياغموردان آرتيق سو قاميشلارینی دينله ين گئجه قيزي ! سايسانا ! چارتلاقلاري دونيا چاتلي گولدانلاريندان آرتيق دير بو يوواسيز روحـــــون و سوسوزلوغو داشا هوپموشجا قــادالي . 37 – جي داياناجاق ! اللريم بوشالير خيابانلارا ... * مني آلدادان كيتابلار ايندي قالديريملاردا اسنه ييرلر ، بير قوجا قادينين زنبيلينه بئله زيلله نرك . يالانچي تانري لار يالانچي ورق لر يالانچي سطيرلر ... * بورادان نئچه يول ، يولا سالميشام اونو ؛ دنيز يولونا . بو ليماني اوره ييمين ايچي كيمي تانييرام ! نئچه گمي لر آردينجا پارالانميشام بورادا من قاغايي لارين قيسا قيي لاريندا بؤلونموشم . رسيملري دورور ، من ، او و بير ده بير قيز پوليس ! منه قالاندا قالميياندا بيرجه بونلاردير و داها هئچ نه ، نه ماتم و نه سئوينجي . او بير گون قاييتميشدي و منده قاييتميشديم . او ليمانا قاييتميشدي منسه تيكانلي سينيرلارين آرخاسينا ... * سسي باشيما دوشور او گونلرين ...
+ یازیلمیش دیر یکشنبه 29 دی1387ساعات 11 بعد از ظهر ə . m \|


بوشالميش داياناجاقلار گئري يه دؤنور بير آندا بئله باخماق ايسته ميرم . گئري ده ياديمدان چيخاريلميش لاري بئله بيرده يئنيلتمك ايسته ميره م . بو نوستالژي اونجا داغيديجي دير كي ، بير آنليق ياد ائتمه يي بئله قورخودور دويغولاريمي . ياخين ياخود اوزاق كئچميش ، بوتون ناكام ! نه بير ماهني نه بير شعـــر . بيلميره م! آنجاق نئيله مك اولار! هر پاييزين بو سويوق سونلاري بوتون ساكيتلييمه توخونور و سوروكله يير مني ان اوچوروملو توتقونلوقلارا دوغرو . روحومو بوتون سون نفس لرين دؤنمز دهشتلري سارير . گئري يه دؤنور باخماق ايسته مسمده ، منيم داغينيق ليغيم تاريخين لال يارپاقلاريني بيرر – بيرر چئويرير و داغيلير قيرميزي سطيرلرينــه . اونلار كيم لر ايديلر ؟ بو گئجيكميش سورغو داييما ايچيمده فيرتينالاشان بير سسه نئجه ده آغيرليق ائله يير و زهرلي سونگو كيمي سس سيزجه سينه اؤتور وارليغيمدان . اونلاري تانيماسامدا ، سانيرام دولانبادولان كوچه لرده و داش دؤشه نكلي آلان لاردا يئني ليك پارتلاييش لي سس لرينه تانيقام و اؤيله دير كي ائله بيل روحلارينين چيلپاقليغيني گؤروره م . تيتره ك اولسايدي دا بو كؤرپولر ! ياتماز دالغالارين اوزه ريندن كئچيره جكدير ماوي قاتاري . آنجاق نه يازيق كي داياناجاق لار بوشالميشدي هر بير چيرپينتيدان و ايتميشدي دوغمــا حاياتين چيلغين نغمه لري ! ايندي ساكيتلييمه توخونسالاردا بو پاييزلار ، هر آن ياد ائديركن او گؤزه للييه آچيلان سحرلري، آزاجيقدا اولسا لار بئله آغير قارانليق دا بير سايريشان ايشيق اولورلار يوللاريمــا و ته پر اولورلار دوشونجه لريمه . بئله دير كي هر ايل مغرورجاسينا او ايتيريلميش شه هرين بوتون خيابانلاريني آياغيمدان كئچيريره م ؛ اوره ييمي تاخير بير بوداق قرنفيل اوزه رينه بوراخيرام او كئچيجي خوشبخت ليين ايتميش دروازه سينه و باش اييره م داشقالاق اولموش مكتب لرينين قارشيسيندا . گئري ده ياديمدان چيخاريلميشلاري ياديما سالماق نئجه آغير اولسادا ، آزي ، كانسئرواتورييايا ده يه ن بوتون قورشونلاريني كؤكسومه باسماق ايسته ييره م ، پيانولارينا ده يمه سين و ماهني لاري سينماسين دیـيـــه !
+ یازیلمیش دیر چهارشنبه 20 آذر1387ساعات 4 بعد از ظهر ə . m \|


قایــــغی ə.m اؤزونوو اویانا بویانا دارتاراق جیرماقلاییر یئری . آدامی سانکی بیر آن دا اودماق ایسته ییر، آرا وئرمه دن هاوایا داغیلان قالین سس ، باشینا دوشور آدامین . ایت دایانماق بیلمیر. ائله بیل ده ده سین اؤلدوروبسن . کؤپئی اوغلو کؤپئی ! آز قالیربوینونداکی زنجیری پاخلا پاخلا قیرسین . گؤزلریندن اود سیچراییر چؤله . آدام گیج گیج دونوب دوروب قاباغیندا ایتین . نه اویانا گئدیر نه ده بویانا . ائله بیل هئچ بیلمیر کی ایت باغلی دیر ؛ آخی باغلی ایت نه ائیلر آداما . اوزاق باشی جیرها جیر سسی اینجیدر بیر آز آدامی یوخسا باغلی ایت نئیلرسه بیرینجی اؤزونه ائیله یر آدام اونون قاباغیندا گیج گیج باخسادا ، آخیر یولونو توتوب گئده جکدیر . ایت گؤرمه میش کیمی او آدام بونو هئچ دوشونموردو ، تیتره مـــسه ده قورخو هر یانینی بوروموش کیمی بیر آزدان ییخیلاجاقدیر سانکی . قارشیندایسا آغزیندان شیره لی سو آخاراق تکجه دیشلری آغاریردی او قارا بؤیوک ایتین . او دایانمادان هوروردو . داها هورولتوسونون زیل بمی یامان یووز آهنگینه چئوریلمیش دی. آز قالیردی اوره یی بوغارسیغی آغزیندان گلسین . آدام سا گؤز قیرپمادان ائله دووروردو ایتی . کیم گؤرسئیدی آدامی ائله بیلردی کی اونون باشی دوز ایشله میر ، قورخاقدی و ایندی ائله ییخیلیر ده یه جکدیر یئره . آدام او ایتین هورمه یینه ، اؤزوده او درجه ده حیرصلی حیرصلی هورمه یینه ساحیل دنیزه دالان کیمی دالمیشدی ! " یازیق ! گؤر زنجیر بونو نه گونه سالیب ! آدامی دا یئمک ایسته ییر لاپ ! نه گون گؤروب آخی . اونو لاپ کوچوکلویوندن تانییرام ، هر یاندان خبرسیز کیمی هامینی اؤزونه دوست ساناردی . هر کیمی گؤرسئیدی آناسی کیمی اونون قوجاغینا آتیلماق ایسته ییردی. قاباغینا قاچیب یوموشاق قولاقلارینی قول قیچینا سورتوردو آدامین . ایکی آغ قاشی و بورنونون قهوَه یی یه چالان رنگی اونون گؤزللیینی داهادا آرتیریردی ! چوخ چکمه دی آنجاق . داش اوره کلی یییه سی اونون قارا یوموشاق قولاقلارینی کسیب باغلادی بو سووخایا قالمیش دمیر زنجیره ! یازیق ! گؤر نئچه ایل دیر بو زنجیر اونون بوینوندادیر . بیر آددیملیق دا اویانا گئده بیلمیر . هردن بیر « یییه سی » نین سیرفاسیندان قالان تیکه پارا آرتیقدان نه یییه جک نه دویاجاق بو قارا اسیر ایت ! نه واختی واختیندا یئمک ، نه یوموشاق بیر نون ، نه قاچان قاچان نه کوتتشمه و نه ده بیر قایغی ! قیش باهار ، یای پاییز زنجیر اونون بوینوندادیر . منده اولسام ائله . . . " آرادان نئچه آن کئچدی بئله جه . هئچ بیر سس یوخیدی داها،هئچ نه قولاغا ده یمیردی ، ایت سوسموشدو آرتیق ، تکجه هردن بیر بوشونا بوللاییردی باشینی . ایندی یه کیمی بونجا قاباغیندا دوروب اونا قارداشجاسینا باخان اولمامیشدی ! کوچوکلویونده خبرسیزجه ایناندیغی کیمی ، اؤزونو آدامین قوجاغینا آتماق ایسته ییردی ...
+ یازیلمیش دیر یکشنبه 12 آبان1387ساعات 9 قبل از ظهر ə . m \|


بو یازقیـــمیز دئـــــییـل ə.m . . . مور بویالی سس گلیر ، تپینمه دن تــــَــتییه قورشونلار چؤله چیرپینیر چیخماغا . سس گلیر، مور بویالی سس لر ... مارش چالینیر ، بیرلشیر ساعاتلار . قاییتماغا چیغیردا یوخ بئله ! چؤرک آرخاسینجا و سو گؤتورمه یه ایره لی قارشی دا یاشیل اولدوز دایاناجاغیندا گؤزله یه نیم وار . ال لرینده ایتگین یوللارین آدی و بیر یازی کی کوچه سی باللی شه هرلره باغیرار هئیکل لرین سینمازلیغیندان اوخویور ! آمان ائولین ! نه لر سؤیله ییر یوللارا بو نارینجی کوفتانین ! روحونا دولارکن چکدیین رسم لر ، و آرخاسیندا جیزارکن قونور جیزگیله یازدیغین کی : بو یازقیمیز دئییل ، بیز مارش چالیریق ، ساعاتلارینیزی بیرلشدیرین ... اوچ اولدوز وار ساچلاریندا ائولین . بیزه نه لردن دانیشاجاق اونلار ؛ قورد قیران چووغون ، ایسلاق اورمان و بوزلاق یوللاردانمی ! مور بویالی سس گلیر اوزاق دان قامچی لاییر شافاق سیز اوجقارلاری بورولقان هاوا و تنها شابالید دینمزجه دوورور اوستــن دونموش ایرماقلاری ! سنین سس سیزلییندیر منی اویادان ائولین !
+ یازیلمیش دیر دوشنبه 6 آبان1387ساعات 8 قبل از ظهر ə . m \|


سـسیمی ائــشیدمیرسنــسه ə.m ســـرر ماساما قارالانماغا نه دوش لر و اوچورار توپا توپا سود یولونا دک نه باش لار مندن بو سئودا . آنی لاری اونودولماسین ، اسپانیولجا اوخودوغون شعرلر و دوزلو – دوزلو ، گوله – گوله چئویرمه لرین بیزه او شعرلری : باتوم لارلا آفیش لرین دؤیوشو و خییابانلاری یاغاری آلتینا آلار یاغیشلارین هؤرویونه دولاشار ائنمز ال لر ! اونودولماسین ! اونودولماسین ! لپیرلرین هله ده دورور ؛ تاختا نرده ده سئودیین یاس یارپاقلاری و زمزمه ائتدیین- آی ایشیغیندا- ماهنیسی:" گل گئدک بیزه ، دوراق اوز اوزه آی ایشیغندا ..." پنجره نیز سن هر باخار کن اوخشاردی، آرخاسیندان گول دولو فورغونا باخان قیزجیغاز لی اون بئشینجی قرینه لرین رسم اثرینه و سن او قیز ! بورام – بورام قوخور خاطیره نیز هله ده ... سون آرزودا صلیبه چکیلسه بئله یئنه یئری وار یارینلارا اینانجلارین ! چؤکه مز شئه لی اوزاقلارا اوزانان جیغیرلارین یولا دوشه نی و سینماز هئچ بیر قورشونلا پارتلاق دوداقلاری گؤزلر بولاقلارین گوزگوسو ! اسپانیولجا اوخودوغون ماهنی لار دیمدیینده زیتون بوداقلاری گزدیرن قوشلار کیمی، قوپاماز قاسیرغالار اسسه بئله باشیمدان و فریادیما بو قیرمیزی ایزلرین تپر اولار داییما ! سانما سنله دوغان سئودا سن سیز بوراخیلاجاقدیر باشینا ! من آفیش لریمیزیــن دلی سی یم سسیمی ائشیدمیرسنسه ال لریمه باخ باری ، ال لریمه باخ نفسلی دیرلر هله ده نازلیم و خط لرینده اللریندن خریطه لر یازدان یازا کؤرپو کؤرپو ! قورتولوشونا یئترم بیر واخت و آلمالارینیزدان سبد سبد ایچه رم ؛ آنی لارین اونودولماسین ، سود یولونا دک نه باش لار مندن بو سئودا اوچورار توپا توپا و سرر ماساما قارالانماغا نه اوزون اوزون دوش لــر ...
+ یازیلمیش دیر دوشنبه 29 مهر1387ساعات 10 بعد از ظهر ə . m \|


گؤنـدریلمه ین مکتـــــوب ! ə . m او گونو داش دؤشَــنکلی بیر کوچه ده اوز – اوزه ، گؤز – گؤزه چارپارکن کئچدیک اوره ییمیز قارشیسیندان . بورالار دئییل دی . یاخین بیر اوزاغین کوچه لرینده . منی تانیمادین . سن منی تانیمادینمی ؟! دوغرودور تانییا بیلمزدینده ! آخی نه اورا داریسقال سللول و نه اللریم مور ایدی! کؤینه ییمده میل – میل دئییلدی و اوزوم توکلو ! و نه ده 1995 . منی داها بنزریم چوخ اولان بو مین رنگلی شه هرده نئجه تانییاجاقدین ! منیدیم ، من؛ داها دوزه لن "سینیخمیش" اوزومله ! اِ ...ه باشیمی ایتیرمیشم لاپ ! آخی ماوی کراواتلا و توت بوز کت شالوارلا بو ایلیق یئللرین سیغالی آلتیندا نئجه تانییاجاقدین منی . بو ، اوزونه بزک چکیلمیش ، دئوریله – دئوریله قانسیز زامانلارین قالیغینی ! اوزاقلاشماغا ساری ، سللول دان سللولا کئچرکن آغریدان توتدوغوم بارماقلاریمی قاچاراق باغلاماق ایسته دین لئچه یینله ؛ اونودمیشدین کی اولماز ! گؤروش واختیندان آز قالیر دئدیلر . منی تیترک بیر گولمک توتدو ، عصب داوالاریمی یئمه دییمدن ! اون ایله نئجه دؤزه جکدین . هله اینانسایدیندا کی من گوناهسیزام ! زهریمار چادرا قویمادی دویونجا گؤروم سنی . اینجه لیینی گؤزدن ایتینجه گؤرمک ایسته ییردیم ... سن بیر فیدان کیمی هله چوخ گنجیدین و قارشی دا اونیوئرسیته نین آغیر تست لری واردی. بیزی بیر یئنی دوستاق یاساسی آییردی :« تکجه بیرینجی عایله عضولری گؤروشه گله بیلر لر»... ایندی من ده ییشمیشممی ! یوخ – یوخ تکجه ایچیمده گیزلنمیشم ! یئنه اللریم مور ، روحوم مـــور و شه هر داریسقال سللولدور منه ، لاپ کؤینه ییم میل – میل اولماسادا ! بو یاسادان سونرا بیر داها ، هئچ واخت هئچ بیر سللولدان سللولا کئچرکن لئچه یینی یاشامادیم . ائشیتدیم کی سینیرلاری آدلامیسان اوزاقلاراجاق! ... بیر ته هر گلدیم ! بو اوزاق شه هرده ، سن ایدینمی او گونو قارشیما چیخان ! یوخسا داش فرشلی او کوچه ده ایللرجه یاشادیغیم کابوسلاردان بیریدیمی . . .
+ یازیلمیش دیر سه شنبه 16 مهر1387ساعات 4 بعد از ظهر ə . m \|


نییــه بویانمیرام ə . m چؤللر آخیر ، اورمانلار آخیر،خییابانلار ، اوتوبوسلار آخیر ، مترو لار ، اینسانلار آخیر ؛ دایانمادان اونودولور ، میصیر فرعونلاری ، آلمان نازیست لری و توپدان اؤلدوروجو "اینسانلار" اونودولورلار . یئر اوزو آز قالیر اوشاق باغچاسینا دؤنسون یوموشاق ، سوچسوز ، ایلنجه لی و سود قوخولو ! یوللار بیتیر .گؤروش لر ، اؤپوش لر چوخالیر و اوخوماق و بیلمک و یارادماق و سئومک اوجالیر . هر مؤوسوم کی کئچیر آخیر قلم ، آخیر کاغیذ . داها نه سن و نه من یانمادان قارانلیقلار آیدینلیقلارا چیخیر ... ایشیق ، ایشیق ! نه صمیمی دیر دؤیونتولره آرخا چیخان بو سؤزجوک . قیرمیزی زامانلاری آرخادا قویدیق ! بونا یا قالیرمی هله ! منیم سورغولاریمی جاوابسیز قویادا بیلر اوشاقلیق رسمینی گؤزومدن آسدیغیم قیز . آغزیندا سوسقا و اینینده سارافون دون ! آنجاق او سوسسادا من آنلاییرام : اوچ مین ایلدیر توز باسیب مئیت لرینی تانریچالارین و من هئچ قورخمادان باشماغی واکسلی و کـُـت شالواری اوتولو آغ یاخالی کؤینگیمله قاهیره نین کوچه لرینی گوله – گوله دولاشیرام . زامان آخیر و بونو بیر آن بئله آنلامیردی مئییت لرینه اهرام هؤردورن فراعنه . اوتوبوسلار آخیر و آلمان نازیستلری یوخدورلار و من براندنبورگ دروازه سیندن یوخلانیلمادان کئچیرم ... هاوانی بوز کیمی ایچه ری اؤتورمک نه سرین ایش دیر . نییه بویانمیرام سئوینجینه بو یاغمورلارین و سولانمیرام . بو تورپاق پلانئتینی یاریب اوزاقلاردان باخماق یئتر . توز دانه سی دیر بونجا بؤیوک ساندیغیمیز وارلیق و بو دانه ایچره دؤیونن بیر روحون باشقا بیر روحا یادلیغی یاراشیرمی هئچ ! یئر اوزو بیر اوشاق باغچاسی اولماق دا و گئجه میز ، گوندوزوموز فیرلانماج کیمی ، دئییلمی ؟! آرابالار ، قیلینجلار ، گلادیاتورلار ، سونگو لر آخمیرلار ...
+ یازیلمیش دیر سه شنبه 9 مهر1387ساعات 4 بعد از ظهر ə . m \|


« يئنه شاعيرليیيم ووردو باشيما » ! Mikail müşfiq بئله اولسایدی داییما . . . ۱ باغیشلا دئییردیم گلمه ! سندن و بو گونلر ، فیرچالاریمدان باشقا نه ییم وار کی ! اولمادیغین واخت ایشلریم بوتون ، یاغیشلارین کؤلگه سینی چــکن بیر رسسامین ایشلری کیمی اولور ! تورو پارالانمیش او بالیقچی کیمی ، ایرماقلاری بوشونا کئچیرم و کولکلر پئشینده یم سانکی داما ، دووارا چیرپیلیرام ! بیلیرم اوخویان کیمی دییه جکسن "یئنه شاعیرلییین ووردو باشینا " آنجاق یوخ،بهروزدئمیشکن:"یاخشیم"! منی سینیرسیزلییمه باغیشلا ! حایاتین یوللاری او قـــه در توزاقلی ، توتساقلی دیر کی قفیل دن باشینی ایتیره بیلیر اینسان ! و من بونا اعتراف ائدیرم ! ۲ . . . سنه ان اوغورلو یارادیجیلیغیمی سونارام ، یارادا بیلسم ! و آرزولاریمی محو ائله ین ان دیو صیفت دوشمنیمدن کئچرم سنینله اولسام . چونکی سن باریشیغین اؤزوسن . نئجه دئییم ، یوروک سئوینجی و چیمرلیکلرین سرینلییی سن ، سن ! کئشگه بسته له سئیدیم بوتون اولوسلار سئون بیر ماهنی ! کئشگه یازا بیلسئیدیم بوتون دیللرده شعر ! وااای دویارکن دوشونجه نی دونیالیلار ، کیمسه سیلاحا ال آتارمییدی یئنه! و کیمسه ایسترمییدی اوشاقلارین دونسون یوخوسو ! نئجه ده اعتراضیم یئرسیزمیش و نئجه ده یانیلمیش بو سرسری باشیم . من رسسامام ، اوره یین داییما جیزگی لریمده دیر و سود یولونون اولدوزلاری قه در بویالاریمین ذرّه لرینده سن . دوز دئییرسن یئنه شاعیرلیییم ووردو باشیما ! نه خوشدور بئله اولسایدی داییما ، باشیمی قیزمار سؤزجوکلره بوراخیردیم ، سنی یازسینلار دییـــــه ... بهروز صدیق ٬ یالقیز آغاج دوستلوغوندا
+ یازیلمیش دیر پنجشنبه 31 مرداد1387ساعات 11 بعد از ظهر ə . m \|


سن بو اینجه لیک لرینله . . . 1 - گوندوز دور یئنه قارالیق دیر ، کوچه لر اوزه رینده آیاقلاریم هئچ یئره سوزولور . تنهالیغیمین سرت اللرینده کؤله کیمی دینمزم و سو کیمی هوپورام بوشلوغا . سن سیز ده اولور ، درد بودور ! دیوار باشیندان کوچه یه بویلانان قوجا یاس چیچه یی منه اوره ک وئرسه ده ، بیلمیرم نییه یئنه ، ایسیــنی خاطیرلایا بیلمیرم . آلمام ! سنی ، منی ایچیمدن آییرمادیغینا گؤره سئوه بیلیرم ! نیفرتلریمی بیَـــندیینه گوره ! ایندی منی اؤزگه لر دوشونمه سه ده اولار ؛ من نیفرتلریمله تانینیرام ! ایندی هر زاماندان آرتیق گره ییم سن ! قویما سن اولمازدان یاشاییم ، آدینی یاشاماق قویارساق بو ایشکنجه لرین ! 2 - یئنه قارالیق دیر ، بالاجا اوتاغیما دؤنورم ، یازی ماسامین اوستونه داغیلمیش واراقلار ، قلم لر ؛ هامیسیندا سن ، هامیسیندا سن سیزلیک . قارشیمدا کی تابلودا " مونا لیزا" نین سویوق تبسسومو و رف ده قارا قیرمیزی سایسیز کیتابلار و حیاتیما داییما زوی توتموش دیواردان آسیلان تار ! هامیسی سنه وورغون هامیسی سنه ده لی! پنجره دن هاوا کیمی واریب روحوما دولور " گؤروشه جه ییکمی " سؤزو ! یاشاییرام و اتهام بودور و بو جاواب سیزدیر . خیالین موسیقی دیر منه تار چالیر و کؤرپو اولور اوزاقلارا ، سونسوزلوغوما . منه سیغناجاق وئر ! یوخلوغون اؤنومده بیر اوچـروم اولور ، دؤزونولمز اولور ، بوز کیمی ، اود کیمی . 3 - من سنینله کئچدیم خان آرازین حیات دولو روحوندان . من سنینله کئچدیم آرازبوران اورمانلارینین چارپازلیغیندان و قورتاردیم ! قویما سن اولمازدان یاشاییم آدینی یاشاماق قویارساق بو ایشکنجه لرین ! سئوگی قورتولوشا چاتمادان گوناه دیر ! منه بونلاری سنین گؤی دن دئییل یئردن قوپان آیدین سسین سؤیله دی ، بونلاری منه داملا – داملا سئله دؤنموش دویغولارین دئـدی . سن بو اینجه لیک لرینله کئچدین منیم پارام پارچا یارالاریمدان ! شئه کیمی سانکی بیر گئجه اؤتدون منیم دیریلییمدن و منه اینسانلیغا باخ دئدین ! من داها اینسانلیغا باخدیم ! و برباد اولدوغوما بئله و بؤیله سینه ایدی کی یاخدیم اؤزومو بیر سحر قانلی بیر سئودایـا ! آلمام ! سن سیز ده اولور ، درد بودور !
+ یازیلمیش دیر شنبه 12 مرداد1387ساعات 1 قبل از ظهر ə . m \|


قاپی لارین آرخاسیندان سئکوریت قاپی آرخاسیندان ائشییه دوورورام . خیابان قیراغیندا ایشیق ساچلاریندان سیغال آلان ساللاق سؤیود بوداقلاری اوزه رینده ایکی قارا کپه نک ال - اله وئرمیش کیمی اویناشاراق اوچوشورلار . من یوموشاق بیر اوتوراجاغا باتاراق اللریمی باشیمین آرخاسینا هؤرموشم . کولئر ایشله ییر . هاوا قیزاراق اؤزوندن چیخسادا منه بیر شئی ائله یه بیلمیر . بیر اوجا بوی ، نرمه نازیک قیز خایلاغی یئنی یئتمه دورنا کیمی سکیر خیاباندا . یانیندا گئندن قیر قابینا بنزه ین قارا چادرالی بیر قادین هئلله نه – هئلله نه گئدیر. یاخینلیقدا ، تیکینتی ده ایشله ین ساری باش بیر گنج فهله تولومبا کیمی آه چکیب ، گؤزدن ایته نه دک سوزور قیزی آرخادان . بو حالدا اورادان اؤتن بیر موتورون جیرهاجیر سسی ده گنج فهله نین پوزا بیلمیر خیاللارینی . . . جومه آخشامی گون اورتا ساعات 12 دیر . گؤره سن ، سوربن اونیوئرسیته سینده نئچه دیر ساعات . یاخود قناری آدالاریندا دا بئله گون اورتادیرمی گوره سن . گون به گون یئنی لشن قاپی لارین آرخاسیندان ائشییه دوورورام . تاختا لؤتکه دوشور یادیما ، قامیشلیق و چئوره سینده دولاشان آدین بیلمه دییم آغ آپباق اوچارلار . ساری باش گنج اوغلان ، او تاختا قاییق اوزه رینده ، نرمه نازییی اوتوردوب یانیندا ،قوشلاری ساییر اونا ؛ بیر ، ایکی ، ... اون بیر ، اون ای... . « اون ایکی اولدو کرپیجلری گتیر داها » ، چیغیران بننانین زیغلی سسی گوللـه کیمی ، فهله نین قولاق پرده سینی ده لیب کئچیر . . . Ⅶ آردی ---->
+ یازیلمیش دیر چهارشنبه 26 تیر1387ساعات 3 بعد از ظهر ə . m \|


اوزه ریــمدن اؤته جـــک . . . گئجه یم ، ساعات اون بیـــــرم ، یـــازماغا کؤنوللو گلدیم ! گلدیم کی الیمدن دنگ اولان آنی لارین آردینا واریم . یاساقلار ا باخمادان یاسالارا آرخا چئویردیم . پوزدوم سؤنوک قاسیرغالارین آدینی چؤللردن و آرزوسو بوللو شه هر ه دؤنن قاتارلارا یالواردیم کی یوکلرینه بیر آز قار تامی سپسین لر ، یوخسا آنلاماق آغیر بو چاتلی یوللاری ، بو آنلامی قاوراماق آغیر . سارسیلیر روح ، خولیالاری چؤکرسه ساختا باتاقلیقلارا . دوزدور ، هرنه اؤز بوینومادیر بو جهنم قوخولو اوتاقلاردا ، کوچه لرده و کاغاذلاردا ، من کؤنوللویم . اللریمده بوراخماغا حاضیرلادیغیم قلم بلکه قرینه لر اؤنجه سون رسمینی چکه بیلمه ین بیر رسسامین بارماق سوموکلریدیر ، بلکه. قاپامادیم هئچ پنجره نی و گولدوم حایاتی یازماغا جان آتان ایچیمده کی اینجه دیــوه ! گئجه یم ساعات نامعلوم ؛ واریم یوخ یوخوم یوخ ، بئینیمده دولاشان سؤز پارچالاری قالاق – قالاق سوورولمادا . نه دن دانیشیم ، اوزه ریمدن اؤته جک میلیاردلار ایلین توفانلاریندان . بلی ! بیر واخت اولاجاق کی بو ، ایته سی سطیرلریمین اوستوندن میلیاردلار ایل ، میلیاردلار سویوق ، ایستی مؤوسوم لر کئچه جک .میلیاردلار گون ،میلیاردلار آی ، میلیاردلار ساعات ! او زامان من هارادا اولاجایام! آنلایا بیلمیرم بونو آنلایا بیلمز دوشونجه لری و بئله دیر کی سارسیلیر باشدان باشا داشان روحوم خولیالاری چؤکرکن ساختا گئرچکلرین باتاقلیقلاریندا . شعر یازماغا کؤنوللو گلدیم ! کیمسه گوناهکار دئییل . بیر الیمده آغ بویا بیر الیمده نفس ؛ کئشگه بئله اولایدی ! بیر الیمده آغ بویا بیر الیمده . . . نه ایسه ، یئنه یانیق شه هرین دروازالارینا دوغرو گئدیرم ؛ دؤنن قاتارلارا یالوارماغـــا Ⅶ آردی ---->
+ یازیلمیش دیر سه شنبه 11 تیر1387ساعات 0 قبل از ظهر ə . m \|


من ایناندیم کی . . . کؤرپولری آرخامجا سیندیرا – سیندیرا گلیرم داها گئری یه دؤنوب باخماق بیله ایسته میرم . هر نه اولور اولسون ، قارشییا دوغرو باخیش لاریمی ایتیلتمیشم ، یاریب آدلاماق ایسته ییرم هر نه کی قارشییا یورومه یه قویمور منی . ایچیمده دوغو یانلیشلاری ، دوغو باخیشلاری بیرر – بیرر سویسادا یئنی ، تر قابیغیمی دایانامام . ایچیمده اوتورمایاجاق بیر چئوریلیش وار . سوسوز دنیزلرین آرخاسینجا گئده جه یم . بیلیره م گونش منه اسمه یه جک ، کولک منه شاخمایاجاق و منه کیمسه فصیل سیز ایللرین یئرینی گؤسترمَـــیه جک . بوراخدیم اؤزومو باشینا ، گؤیلوم نه ایسته سه ائله یه جک ، عاغلیمدان بیر شئی چیخمادی ، قوی منی باشی داشلی سایسین قیسا اوچوشلو اینسانلار . قوی ایللرله ، اون ایللرله «گبه ر » یم سئن لرده اوخونولمایان بسته لریمین قاداغا لیغیندا ، آنجاق یانیم اگر بیر آن یاشاسام گئری ده . منیم کئچمیشیم یوخدور . من تانیمیرام قیلینجی ، گوجو ، قهرمانلاری . دیریلیک ایریلیک دیر و بئله دیر کی دیری باغیرتیلاریملا قاچاقچی لارلا قوجاقلاشان پلیس لره ، قیزدیم ! اؤلوم اولسون اؤلولره . من دایانا بیلردیم اگر تانیق اولماسایدیم یاغمورسوز بوزقورلارین یانیق لیغینا . من یاشایا بیلردیم بؤیله اگر آیا باسیلان اینسان لپیرلرینی گؤرمه سئیدیم . من ایناندیم کی حایات اونون اوغروندا جانینا قییمایانلارین دیر و بونونلادا سیندیردیم آرخامدا کی بوتون کؤرپولری . ایندی ، هر یاغمور دوعا سی ایچون چؤللره گئدرکن چتریمی اونودمورام . . . Ⅶ آردی ---->
+ یازیلمیش دیر جمعه 24 خرداد1387ساعات 0 قبل از ظهر ə . m \|


سني تاپمـــــازكن ۱ - اونو اللريندن قاباق ياراتديلار و ديليندنده قاباق ؛ اوره يي بويدا ياراتـــديلار ، سبب نه ايدي ! اونجا قازاماتلار ، اونجا دوستاقلار ، و هله هئچ واخت تايي ، برابري اولمايان سئودا يولچوسو . بو حيات نه دير ! بو كرامت نه ! يانمازدان صفاسينا وارماق قاداغا . بيلمزدن صداسينا دالماق ماحال . بيلمك و بيلمك و بيلمك . سينيرلريله سئودي . دوشمه دن آياقلارا و اؤلمه دن يوخلوقلارا قوپدو بير سحر قاراليقلاردان و قاسيرغالار پئشينده گئتدي . او بيله ركدن گئتدي و سينماق ايسته مه دي قارا دالغالارين كيرلي كؤپوكلرينده . غاليبا حياتدا محو اولمايان بير شئي لر وار ؛ و سينمايان يوللار كي هر بيري كئچيلمز جه سينه سرت . اونو اؤزوندن اؤنجه ياراتديلار . . . 2 - آمان زامانسيزليغيم آمان گومانسيزليغيم ! سني حيـــرت آلانلاريندا تاپديم . اوندا كي دونموشدو قارالميش قاني سحرين ، سني اؤزله مزكن . اوندا كي سؤنموشدو آتشي ماوي تونقاللارين اوزاقلاردا يووارلاناراق سني تاپماز كن . منم ، يارالي مؤوسوم لرين كئچيدينده سيزيلدار سيرتي يانانا كيمي و ياشماقلانار باريش روياسي گوللــه له نن آنا كيمي ، اولايار اوره ك ياتانا كيمي ! آمان قولباقلاري قانا باتميش زيبا ! سنه ده ين قورشون منيم گؤزلريمه ده يئــيدي كاش ! سنه چكيلن ته تيكي كؤكسومه ته پئيديم كاش ! سندن سونرا اللريم ندن سينمادي . سندن سونرا نفسيم ندن كسيلمه دي آمان ، آمان ، آمان منيم آمانسيزليغيم . . . Ⅶ آردی ---->
+ یازیلمیش دیر دوشنبه 30 اردیبهشت1387ساعات 0 قبل از ظهر ə . m \|


فـــــــــریادیما هوپارکن تاخیلدیم آدینلا انگین روزگارلارین اسیمینه ، دوشدوم اوزاقلاردا رسمینی چکن چاخیشلی شافاق لارین آرخاسینجا . آجی لاریمدا بؤلوک – بؤلوک تیترک دوزلوقلارین وارکن و دینمزجه عاغلیمدان اؤترکن آلوولارین ، من دایانمادیم . نه قه در کی دورور چارپینمالاریم و نه قه در کی بو ائنیش سیز یوللارین عاغلیندا دیری دیر خاطیره م ، رنگلریم آتمازدیر و آللادیجی ایلغیم لارین پئشینه ائنمه یه جکدیر وارلیغیم . آخ ! سنینله نه اوزون زامانلار اییلمز عوصیانچی حایاتی یاشامیشیق و قارا دوستاقلارین سرت دمیرلیینی ازمیشیک اینانجلاریمیزلا . آلقیش آیاقدان دوشمز دوستلوغونا و ســـــلام توکنمز سئودانا نازلیم . یاد ائدیرکن قورتارمازلیغینی ، کئچیرم ایل لرین ، قرینه لرین بیته جک لییندن و چاییرلاشیرام آخارلیغینین بویونجا . آخ منیم پارلاق گؤوهریم ! بو ، بانی چؤکموش شه هرین قورخونج یوخولاریندا سنینله نه چاتاق یارالاری یاشامیشیق و نئجه توخدامیشیق نئچه – نئچه چیله لری بئله . نه دئییم !داها نه لری باغیریم ! او کؤکسو ن دولو گیزله و او دوشونجه ن دولو دوش له فریادیما هوپارکن . سنینله برابر اوخودوغوموز هیمن لر برابر یاغدیغیمیز شعیر لر ، هامیسی جان هامیسی هیجان کیمی قالخار بئینیمده و هر زامان توتوشار آجی لارین بؤلوک – بؤلوک لپه لنرکن منده آخ ! منیم بوزلو سحریم . . . Ⅶ آردی ---->
+ یازیلمیش دیر چهارشنبه 11 اردیبهشت1387ساعات 11 بعد از ظهر ə . m \|


اوزاقـــــــــــــــــــــلاردا آتدیم ! باداقلار کیمی دایانمیش دی قورتولوشومون اؤنونده . اونا داییما دورمادان گئتمه یی وورغولاسامدا آنجاق او بیلمیر دی کی من چوخدانیدی اونون گؤزلریندن اؤتموشدوم و ال لرینه باتماز قانلارین یوخوسونو دانیشمیشدیم . او هله بیلمیردی کی بورادا یاغمور گؤزل آلینانین اؤلوموندن سونرا هله بیر آنلیق دا اولسون بو شه هرین یاتاغینا گیرمه ییب دیر . آتدیم ! منه و بیزه انگین گؤی لر گره ک ایدی ؛ شیشه لری یوماق و سونرا داملا داملا دوستاق لیغیمیزدان قاچماق . اونا داییما دئییردیم کی من بیر ماوی دایاناجاق آرخاسینجایام اورادان کی گئدیر ، هاوایی لیغا چاتماق اولور و اؤلمه یی سیندیرمیش لار اورادا . . . قورتاردی ! گؤزونو قیرپینجا سحر آچیلاجاق و بیزی اوخوماغا بیر ثانیه بئله واخت تاپمایان کیمسه لر ، نه لر چکمیشیک بیلمه یه جک لر و قهقهه لریله توزلارا چؤنموش دؤیونتولریمیزین اوزه ریندن سایمازجا اؤته جک لر و هئچواخت بیلمه یه جکلر کی گؤزل آلینا آدلی بیر شئه لر تانریسی یاشایارمیش بورالاردا و بیریسی هر گون اوندان بیر رســـم ، وارلیغا پای چکرمیش . آتدیم ! او منه او چیلغین گئدیش لرین یئرینی وئره بیلمزدی و دویا بیلمزدی کی دایانماق نئجه ده باغیشلانیلماز بیر سوچ دور . آلاتوران دیر ، لالجاسینا بایان بیر هئیکلین قارشیسیندا دایانمیشام ، قوللاریمدا آغ قرنفیل لردن اکلیل و بیر رمان ازبریمده ؛ سطیر – سطیر حایات دان دویدوقلاریمی اوخویورام اته یینه . بایان بیر هئیکل ! باتقین گؤزلری اوزاق لاردا بیر دایاناجاغا دیکیلمیش . . . Ⅶ آردی ---->
+ یازیلمیش دیر جمعه 30 فروردین1387ساعات 10 قبل از ظهر ə . m \|


دیـــــــــــــــــــوارلاردان او یانا اوزون بیر یولا دوشموشم . قیزمار سؤزجوک لر دوداغیمدا گولوش لری مشق ائدیرلر . سئوینجه حاضیرلاشیرام . چاتاجایام . ایندی ساری کؤرپولری هر زاماندان آرتیق سئویرم . روحوم کانت – ین عاغلیندان روحوم کانت – ین دوشونرلییندن اؤتور ؛ هرنه یه اینانمیرام داها . تکجه دوشدویوم بویاسیز یولا و بیرده بسته کار دوستومون کیمسه اوچون هله چالمامیش ملودی لرینه اینانیرام . من ، و یازیرام کی یازلاشیم ! نت سیز یاشاسام دا و قیرمیزی اوزاقلارین قوخوسونو ائشیدمه سمده ، یئنه توتوشورام ! آلقیش « جین فریدمن » - هَ ! ، بایان لی سطیرلرینه و کؤکسونون سؤنمز دؤیونتولرینه آلقیش ! من اوندان اؤیرندیم کی هئچ نه بیلمیرمیشم هله ، اکیلمه ین شوم لاری اوخویارکن و قارقالار ، اویوق لاری یاتان تارلالاری آرالاریندا پایلاشارکن . گؤیلوکلرله دانیشمیشام ؛ بئینیمین قالیقلارینی دیوارلاردان اویانا باسدیراجایام و یونگولجه سینه اؤته جه یم سئودییم کؤرپولرین اوزه ریندن .نئینیرم تاوان سیز سیغیناجاقلاری ، نئینیرم چپرلــی آلمالیق لاری . . . دایانمیشام اونو ایلک کز گؤردویوم دایاناجاقدا ، بلکه یئنه یاشیل تراموای لا گلدی ! اونو یاد ائدیرکن سؤز اینام دان ، سؤز کؤرپودن و سؤز آلمادان دوشور ! سس سیز بیر سئودالی سحر ملودی لر دالغالانارکن کؤرپولردن اؤتور ، آزاد آلمالیق لارا چاتاجاغیما ، محض اینانیرام . Ⅶ آردی ---->
+ یازیلمیش دیر یکشنبه 18 فروردین1387ساعات 6 بعد از ظهر ə . m \|


و باهاریم بؤیله سینه . . . باهار گلدی آنجاق آمانیم یوخ ، قراریم یوخ ، روزگارلارا ساریلار اوره ییم دئییل یئرینده ، اته ییم بوش ، واختیم بوش ! باهار گلدی آنجاق نه قارانقوش نه نغمه . باخچالاریم بوراخیلمیش ، گولدانلاریم بوش و خیاللاریم اوزاقلاردا هله ده ایتگین، هله ده سورگون ! نه دایاناجاغیم نه قاتاریم نه گله نیم یوخ ! یازیلاریمین یازغی سینا دالمیشام ، قالیق مکتوبلاریما و ایچینده اوخونولمامیش میصراعلارا ! من ندن بو اوچوروملاری آدلامادیم و اؤتمه دیم بو بوش ورقلردن! اوره ییم آچیلماز قاپی لاریم کیمی ، مادام کی ، یئنی هاوالار دولماییب باشیما و اؤتمه ییب گؤزلریمدن یاشیل چیراغلار ! باهار گلدی آنجاق قوپماز سطیرلریمدن اسکی تیکانلار و گولمز قارشیمدا کی تابلودا توتک چالان قیزجیغاز و سوزمـــــز ایرماغیندا کی قاییق ! آمانیم یوخ ، قراریم یوخ ، توتوشار بیتمک بیلمه یین یارالاریمدا سئودا ، و باهاریم بؤیله سینه توکنـــــــــر . . . روحومدان لیمانلار کئچیر ، گئتمک ، گئتمک ، اوزاقلاشماق و اوکیانلارین و بوزلاق آدالارین سوکوتوندا سئویشمک ! ای هئی اوزاقلارا اوچان اوچاقلار ، ای هئی قورتاریلمیش یوردلارا اسن قانادلار ، داریخیرام ! داریخیرام بیر تومورجوق بئله وورمایان دیوارلاریندا ، دامـــلاریندا بو شه هه رین ، داریخیرام تارسیز سالون لاریندا ! رنگ سیز قالدیریملاریندا ! بیری وارمی اللریمی سمفونی لره تاپشیرسین ! Ⅶ آردی ---->
+ یازیلمیش دیر شنبه 3 فروردین1387ساعات 11 قبل از ظهر ə . m \|


پوزدوم تامام جیزگی لری 1 . . . سنه اینانماسایدیم منه اوزاقلارداکی میرواری لر اینانارمی دی ! سنه یانماسایدیم ، گونلریمین بو توتقون قارشیسیندا سؤنوک اومیدلریم یانارمی دی ! بونو بوتون افسانوی آنی لاریمیز دا بیلیرلر . دولاشیرکن یاد اؤلکه لری بئله ، سندن سنه یازدیم داییما ، و یازدیقلاریمی ساویردیم تانیدیغیم و تانیمادیغیم هوندورلرین دویغولارینا . مندن اولسایدی رسمینی بوتون یوللارین باشلانقیجیندان آساردیم ، و قورتولوش اییلی سسینی بوتون ماهنی ائشیدمه ین قولاقلارا باغلاردیم تانا کیمی ! آنجاق یازیق لار ! بیز هارادان باشلامالیدیق سحرلره وارمادان و هله اؤنوموزده ایتن یاشسیز مؤوسوملرین دادیلمایان سئوگیسینده آجی لار واریکن ! بیلمه میشدیک قارشیمیزدا سایسیز اوچوروملار بیته جک و ائله اولاجاق کی اوچارلارین سؤزوندن چیخاجاق یاسمن لر ! 2 . . . نئجه یازا بیلیردیم من ، سن اؤیرتمه سئیدین ! نئجه اوخویا بیلیردیم من ، سن ماهنی لانماسایدین ! بئله ایدی کی آرخالاناراق قایالانمیش هئیکلینه ، پوزدوم تامام جیزگی لری و کئچدیم سینیرلارین هامیسیندان ؛ بوتون آدلاری سویونارکن ،چیلپاقجاسینا تکی اؤزونو سئودیم ! ایندی من اوره یی دولو اینانجلارلا زنجیرلری سؤکولموش بیر قورتاریلمیشام ! آلقیشلار سنین بونجا ماوی قالدیغینا ! حایات گؤزل اولسادا ، اولماسادا سن ، زیتون بوداغی تک سئویلمه لی اولاراق قالدین و سینساندا بعضاً ، دوشمه دین جیلیز دوشونجه لرین هرزه درین لیینه ! نازلیم ! اؤنونده باشیمی ایمیر ، اوجا توتورام غرورلا ، بونو منه سنین آزاد وارلیغین اؤیرتدی ! سن کیمسن ! یئر اوزونده ان ساده بیر اینسان ، او تانری کی هئچ واخت کیمسه یه وارلیغینی سئودیرمه دی و الینی اؤپدورمه دی . . . Ⅶ آردی ---->
+ یازیلمیش دیر پنجشنبه 23 اسفند1386ساعات 3 بعد از ظهر ə . m \|


ایلقـــــــــــــار دورمادان ، اورککجه سینه باخدی و کئچدی او نارگیله م . یادیرغامیش دی سانکی آراز آدالاریندا قاچاقجاسینا باغلادیغیمیز ایلقاری . او زامان کی ، فیرتینالاری خالتالییان باخیش لاری ، قورتولوشوما یول اولدو ! ایشکنجه لریم آرتسادا ، سؤنمه سه ده بئـــله بیر قیغیلجیم بو وارلیغیما دوشن اوددان ، یئنه دوشونجه سیندن چکدییم توتوملو چاخیرسیز کئچمه دی حایاتیم ؛ یادداشیمدا وارکن توکنمزلییه دوغرو یؤنه لن دوش لریندن جیزگی ، من روحو آچیق و ال لری آزاد سئومه یینه داوام ائتدیم . کوکره دیم سئوگی سیله زامان – زامان ، و سون آد گونومه دک ، مؤوسوم لر آدلادیم کی سویوقلاری ، ایستی لری آربا ! چیله لری ، فرح لری تن ! آردینجا بویلاندیم ، سیخینتی لاریم داشاراق ! دورمادان کئچیب یارالاریمدان اؤتن او نارگیله مین آرخاسینجا هله هئچ واخت ائشیدیلمه ین سون بسته لریمی اولادیم :سن اوجالیق سان ! بو چارتلاق یوللارین اوزه ریندن کئچیر او ایپـکلیینی و قییما رمان سیزلیغینا بو قوراقلیقلارین . اونودماکی سنینله بیز یالمانینی قاسیرغالارا ساویردیق آتلاریمیزین و یاراقلاریمیزی اؤزگور اولدوزلارین بوداقلاریندان آسدیق . نازلیم ! ایندی هر شئی چاتارینجادیر ! آنجاق هئچ ، یئرین دولمور ! یادیرغاما کی آراز باساردا سنینله اؤلوم – دیریم ایلقاری باغلامیشیق و بیزه ، قوملارینا شعیر یازدیغیمیز آدالار تانیق اولموش ! دونوخموش گؤزلریمله ساریلمیشدیم کؤچن هیجانلاریما . دوردوم یوخودان . . . دالغین – دالغین دوز سونگو کیمی ایشله دی کؤکسومه . اونودمامیشام دئدی . ایلقاریم ، زامان دان اوسته گؤتوردو اوره ییمی ؛ بوسبوتون توزاقلاری قیریلمیش گؤردوم . اوزاقـــــــلارین ، آرزولاریما سیغال چه کن اؤلکه سینه دوغــــــــرو . . . Ⅶ آردی ---->
+ یازیلمیش دیر یکشنبه 12 اسفند1386ساعات 6 بعد از ظهر ə . m \|


. . . چيله لر قافاني تيترتمزسه ! قيزجيغازيني ايتيرميش گلينجك آرزوسو كيمي ، داملايا بئله حسرت دوزلاقلارين آرزوسونا وارديم ، شيرين آنلار هوپدو خوليالاريما . هر يانيني سو سارميش آدا گؤردوم ؛ ترك ائديلميش گمي نين ، شعورونداكي لپه لره دالديغيني و اوزاقلاردا سينماغا گئده ن يئكلميش قيزجيغازي گؤردوم اللري دولو باليق قولاغي ، او دوزلاقليغي سيغاللاييردي ! قولاي دئييل سينماق ، آدينا كئچمزسه گوزگولر اونو ! قولاي دئييل گؤرمك ، دارليق سينمادان باخيش لارينين آرخاسيندا ! گئتمك ده بو كيمي بير دئوريلمك ، آياقلارينلا دوغولان قانداللاري ازمك قولاي دئييل ، قــــولارين اوچوش هيمني يوخسا ازبرينده ! دورا - دورا سوزمك و اوزاقلاري كئچيرمك عصب لريندن ! بو پولاد سينيرلردن نه اوجقارلار اؤتموش و نه سينمالار كي هر بيري بير سئودا قه در گوزگو ! من سئودامي دووارلار آراسي دئييل سونسوزلوغا بوراخديم . او منه آنلاتدي كي چپرلر ماهناديرلار و روحوموز آزاد . منيم دادلي سئودام بؤيله بوياقلي ! آغ دئييل ، قارا دئييل دوز ، گونلرين قاچميش رنگي كيمي نغمه لي . چيلپاق دوشونجه لرينه ، داشلارين اورتاسيندا رمان يازيرام ، سؤزجوك لر يئتمه سه ده . يئرين يوزينجي قاتـــي دير نه نپتون نه پلوتون نه شئه ونه باشقالاري ؛ يالنيز سن وارسان و بيرده من ، سونسوزلوغونون رسميني چكيرم هئچ بير يارديم گؤزله مه دن هئچ بير قلمه ساريلمادان . يئر بوي دا داشلار آراسيندا داغينيغام . بوراسي هارادير ! نه سويوق نه ايستي ، دوز بيزيمله دويغوسيز "جانلي " لارين آراسي كيمي ، يعني اينكار ! قـولاي دئييل اينكار ، آزاد دئييلـسه اينامين . گولمك قولاي دئييل و قـه قـه چكمك ، چيله لر قافاني تيترتمزسه . دوشونجه لرينين يئتدينجي قاتيندايام ، و رمان يازيرام هيچقيريقلار بوغازيمدايكن بيليره م كي آغلاماماق دا قولاي دئييل . سوسورام ؛ سولاردان و ژورناللاردان اؤيره نديم كي حایاتین روحو سن سن ! و دايانمادان آختاريليرسان بوتون ايتن كيتابلارين موسيقي سينده . . . Ⅶ آردی ---->
+ یازیلمیش دیر پنجشنبه 2 اسفند1386ساعات 5 بعد از ظهر ə . m \|


بیر ساری گلین وار اوزاقلاردا ، بولودلاردا یاشایان گلین ! آدینی بیلمزم اوزونو گؤرمزم . دویغولاریندا آمما هرپاییز سینیرام ، تامام اولور منه حایاتی کوچه لرین ! و سونرا نغمه کاریم اولان سسی پارتلاییر اوره ییمین اوجقارلاریندا ، بیر ساری گلین کی بارماقلاری اوزه ریندن داییما آراز آخیر لیلیله ! و هیجانلاریم بوشونا چولقاییر وارلیغیمی ، آمما دولورام ال لرینین یازیسیلا . ایسلاق دوداقلارین هئچ گؤرمه میشم ! آنجاق یاغمورا ایسلاندیغینی ائشیدمیشم . دئییرلر پاییز اولاجاق صاباح و من اونو یادیمدادیر کی ایلک باهاردا حیس ائتدیم ؛ ساری گلین لیینی حیس ائتدیم و سهو ائتمه دیم و من ایتدیم اونون ناغیل لاریندا ، ایتدیم بیر واخت ! آدینی بیلمزم ، اوزونو گؤرمزم ؛ ساده جه سسینه تانیغام ! سانیردیم کی اورتاق بیر ماویلییی سئویریک ، یارالاریمیز عاینی دیر و اومودلاریمیز عاینی ! آرزوم یوخ کی اولدوزلارینی ساناماق و ساحیلینده بیر اونودولموش ماسا اولماق ! اونو تانییرام او نار چیچه یی دیر و اوره یی کیمسه یه چاتماق ایسته ییر! بیر ســـــــــــــــاری گلین کی ماویجه سینه گونش دیر ائله بیل هر آخشام باتیر اوره ییمین سینیق کؤشه لرینده و هیجانلاریم بوشونا چولقاییر وارلیغیمی ...
+ یازیلمیش دیر سه شنبه 14 شهریور1385ساعات 1 قبل از ظهر ə . m \|


گئجه دیر ! کامپیوترین آرخاسیندا اوتورموشام ، یئنه یازماق مرضی جانیما آغری سالیر! وُرد آیکونو اوزه رینه کیلیک ائله ییره م . بیر آغ پئیج قارشیمدا آچیلارکن گؤزومو ، الیمی و اوره ییمی چالیشماغا چاغیریر! یازماق ، یازماق و یئنه یازماق ! بو چاغیری منی بوش حیات اوچون آردیجیل دانلاییر! حیاتا قیمت وئرمه یه ، واختی تانیماغا و دایانماماغا چاغیریر منی . اؤزوم – اؤزومه دئییره م کی یازا بیلمیره م ! آخی نه قده ر اولمایان شئی لر و یاشانمایان حیس لر باره ده دوشونمک و اوخوماق و یازماق اولور ! اودور کی داها دوشونمک ایسته میره م هئچ نه یی ! دوز دور من دوشونسم ، یازسام و دوشونمه سمد ه ، یازماسامدا ائله یئنه کوچه لرده مکتبلی اوشاقلار چؤره ک – چؤره ک سسله یه جک لر و منده اونلاری کؤمک – کؤمک ایشیده جه یم !! یاردا کی گلمه یه جک ، آرخدان آخان سو کیمی و من یئنه محو اولاجایام ، باشیمدا شراب ایچه جک تورپاق ! و اورمانلاردا گیج بیر قارقا منیم عوضیمه اوچ یوز ایل یاشییا جاق ! کیبوردون کلید لرینده هانسی حرف لری آختاریر بارماقلاریم ، بیلمیره م و بیلمیره م هانسی کلمه نی دوزلتمک ایسته ییره م و ایتیردیییم نه دیر ! بیر سمفونی، پرده – پرده باشیمی منه ترجومه ائله ییر ! بیلیره م نه یی ایتیرمیشم . من اؤزومو ایتیرمیشم ،. هارداسا اونودموشام اوره ییمی! آخی من نییه بیلمیره م کی داغلارین باشی هر آن قار اولا بیلر و یول لار تکجه بوندان اؤترودور کی بیز آیریلیغی آیاقدان سالماغا ایناناق ! من ایشیق آغاجلارینا اینانیرام ، آمما اوستونه قونان قوشلارین هئچ بیریسینه یوخ ! پورتاغال آغاجی کیمی پاییزیمی بزه ین اولاجاقمی گؤره ن و بیله جه یم می گؤره ن کی رنگ لر نئجه ده موسیقی دیرلر! ای هئی ! منی دانلایان بولودلار دایانین بیر آن! یاغین منیم وُردیما و ائله جه ده حرف لری اؤزونده گیزلتمیش کیبوردوما و آنامین چلییینه یاغین ! بوزقورلاریما توفان اسنده ، کئچمیشیمه ، بیر زامانا کی آتاما شعر اوخویوردوم و باجیم نه گؤزه ل رقص ائله ییردی منیم غملریمی و قارداشیمدا ! کاش یازا بیلیردیم دنیزه آتیلان داشلاردان ، سینان دالغالاردان ، سولماز و سولمایاجاق دوستومدان و بیلمه دییم شئی لردن کاش یازا بیلیردیم و سولماز و سولمایاجاق دوستومدان کاش یازا بیلیردیم .......................
+ یازیلمیش دیر پنجشنبه 12 مرداد1385ساعات 1 قبل از ظهر ə . m \|